Ang Eyukaristiya ug ang mga Kabus

Matod pa sa usa ka panultihon: Ngadto sa kasingkasing, ang pinakaduol nga dalan mao ang tiyan. Sa yanong pagkasulti, diha sa relasyon kabahin gayud ang pagkaon.

Ang panaglambigitay sagad timan-an ug ubanan sa pag-inambitay. Mobisita ang ulitawo sa dalaga nga may dala ug pagkaon. Sa pagpanuroy, mangaon pod sila. Labi pa kon kaslon na, naa gayud kombira. Ug natural, diha sa ilang pamilya, mag-uban gayud ang tanan alirong sa kan-anan. Ang Ginoo nasayud niining maong kasinatian sa tawo. Gani sa iyang pagpakiglambigit kanato, iya kitang gipakaon, ug siya mismo ang kalan-on.

Ang kasaulogan diin kita gidapit aron makigsalo sa Ginoo ug diin ang gisaluhan mao mismo ang Ginoo, gitawag sa sinugdanan nga “Pagpikas-pikas sa Pan”. Adunay ritwal sa “pagpikas-pikas sa pan atol sa Panihapon sa Pagsaylo nga naghandum sa pagpalingkawas sa mga Israelita gikan sa pagkaulipon sa Ehipto. Kining maong ritwal, nga pangunahan sa amahan sa pamilya, ubanan sa pagdayeg sa Dios ug sa pag-ampo pag-ila ang Dios mao ang tinubdan sa tanan; apan ang pagpikaspikas nagtimaan sa panag-inambitay ug kalambigitan sa pamilya.

Si Jesus, ang Anak sa Dios, sa iyang pag-anhi sa kalibutan nakigsalo sa katawhan, bisan niadtong gisalikway sa katilingban tungod sa kahimtang sa sala, kakabos, ug balatian. Nagpikas-pikas siya sa pan o nakigsalo uban kanila timaan sa iyang pagpakiglambigit ngadto kanila, butang nga dili masabtan ug madawat sa mga Judiyo. Apan ang dili gayud malimtan mao ang kataposan niyang panihapon uban sa mga yanong tinun-an nga gisugilon nila ni San Mateo, San Markos, San Lukas ug San Pablo. Dinhi, gihatagan niya ug mas lawom pa nga kahulogan ang pagpikas-pikas niya sa pan nga matod niya iyang kaugalingon nga gihatag alang sa tanang katawhan, mayo o dautan, alang sa mas tiunay nga pagpakiglambigit sa Dios — ang kasinatian sa Gingharian nga mao ang kaluwasan — nga angay nga pasalamatan.

Daghang pangalan nga gihatag niining maong kasaulogan sama sa Panihapon sa Ginoo, Agape, o mahigugmaong panagsalo, Eyulohiya o panalangin, o Balaang Sakramento.

Apan ang mas mahinumduman ug gigamit hangtod karon mao ang Eyukaristiya kon “pagpasalamat”. Ngano? Dili lamang kini tungod kay nagpasalamat si Kristo atol sa iyang pagpakigsalo sa mga tawo,ilabi na sa katapusan niyang panihapon uban sa mga tinun-an.

Kining maong kasaulugan pagpadayag usab sa pagkamasalamaton sa tawo ngadto sa Ginoo tungod sa kaluwasan nga gihatag kaniya bisan pa man sa iyang kahimtang sa kakabus sa espiritu ug sa mga butang niining kalibutan. Sa kinabuhi, pagpangalgad, kamatayon ug pagkabanhaw ni Kristo, tataw ang iyang gugma sa mga nanag-antos, sa mga tinalikdan sa palad, sa mga gagmay, sa mga makasasala, ug sa mga kabos.

Ang Eyukaristiya mao ang mapasalamatong paghandum sa sakripisyo sa Ginoo — sa iyang kamatayon ug pagkabanhaw sa Ginoo nga nagdala ug kaluwasan sa tawo, ang pakig-uli niya ngadto sa Dios. Kini ang pinakataas — ang tinubdan ug sangputan — sa tanang pagsimba.

Si Kristo mismo anaa sa Eyukaristiya, lawas ug dugo, sa dagway sa pan ug bino, siya nga maoy sentro sa kinabuhi sa magtotoo, naghugpong sa katawhan sa Dios ngadto sa pagka usa ka lawas, nagpaambit sa kinabuhi sa Balaang Trinidad ngadto sa katawhan. Ang Eyukaristiya dili ra usa ka simbolo o seremonyas, kini usa ka sakramento kung diin kasagaran ang maluwasnong buhat ni Jesus ug ang mga gasa sa Diyos dali rang madawat o maamgohan sa katawhan.

Apan ang Eyukaristiya dili lamang paghandum ug pagpasalamat sa nahitabo sa nangagi kondili paglantaw sa umaabot: sa kahimayaan sa Gingharian sa Dios. Si Propeta Isayas naghisgot og usa ka kumbira sa iyang paglarawan sa kahingpitan sa katapusan sa panahon. Ang Eyukaristiya mao ang pasiuna niining maong katapusan, ang sakramento sa katumanan sa misyon sa Simbahan: ang kasinatian sa kabuhong, ang panaghiusa sa katawhan uban sa Dios, kanus-a ug diin ang tanan magkalambigitay- ang panag-inigsoonay sa tanan.

Apan kining maong umaabot nga kasinatian sugdan na karon diha sa kinabuhi sa mga magtotoo pinaagi sa pagpakabana sa mga panginahanlan sa kaigsoonan. Ang mga magtotoo gihagit nga mahimong abli ang mga kamot sa pagdawat ug pagtabang sa tanang matang sa katawhan ilabi na sa mga nanginahanglan. Kinahanglan kitang magpabilin nga Simbahan sa nga Kabus kon buot kitang magmatinud-anon sa pagkalawas ni Cristo.

Ang kasaulogan sa Yukaristiya puno sa mga timaan sa gugma ni Kristo ug sa Simbahan alang sa mga kabus. Diha sa pagkalawat, gihatag ni kristo ang iyang kaugalingon isip pan nga magpabusog kanato aron, sa samang paagi, kita usab mamahimo untang pan alang sa mga kabus pinaagi sa atong paghigugma, pagpasaylo, ug paghimo ug mga buhat sa kalooy ug duyog-kasakit alang kanila.

Tinuod, ang kinabuhing Kristohanon ug Eyukaristikanhon magdala kanato ngadto sa pag-alagad sa mga kabus. Matud pa ni Papa Francisco, ang Eyukaristiya dili lamang kasaulugan sa atong pagtoo matag semana apan kinahanglan makaapekto sa adlaw-adlaw natong relasyon sa matag usa, ilabi na sa mga nanginahanglan.

Alang kaniya adunay tulo ka paagi aron ato nga masinati ang epekto sa Eukaristiya sa atong kinabuhi ug diha sa atong pagkiglambigit sa ubang katawhan.

1. Ang atong pagtagad sa mga lainlaing matang sa katawhan, mga bata, kabatan-onan, hamtong, tigulang, kabus o adunahan. Sama nga gihigugma kita ni Kristo ug gihatag niya ang tibuok niyang kinabuhi diha sa krus alang kanato, kita usab gitawag sa atong pagpaambit sa atong kinabuhi alang sa atong mga kaigsoonan bisan unsa o kinsa man sila.
2. Ang pagpasinati sa pagpasaylo sa Ginoo. Hinumduman nga ang atong pagtambong sa Santos nga Misa dili tungod kay kita angayan o mga balaan, o kaha aron pagpakita sa uban nga kita mas maayo o ligdong kay kanila, apan tungod kay kanunay kitang nanginahanglan sa gugma, kalooy, ug pagpasaylo sa Ginoo nga atong madawat pinaagi sa lawas ug dugo ni Kristo diha sa Eyukaristiya.
3. Ang pagkahimong katilingbang matoohon ug ang pag-ambit sa misyon ni Kristo pinaagi sa malahutayon nga pagpangalagad sa katilingban.

Ang Ginoo mahimo unta gayud nga kalan-on alang sa tanan aron mopuyo siya diha sa atong mga dughan, sa matag dughan, ilabi na sa mga nanginahanglan.

Pangutana alang sa pagtuon ug pamalandong atol sa pag-inambitay:

• Unsa ang ubang mga pangalan nga gigamit sa pagdawat sa Santos nga Misa o Yukaristiya? Unsa ang kahulogan sa Yukaristiya? Unsa atong gipasalamatan diha sa misa? Unsay gitudlo ni Papa Francisco mahitungod sa Yukaristiya?
• Sa unsang paagi ang Santos nga Misa nagdala kanimo ngadto sa pakiglambigit sa mga kabos?

Sugyot nga kalihukan:

• Mobisita sa silingan nga dili tigsimbahan aron dapiton sa pagpakig-uban sa kasaulogan sa Misa, Kasaulogan sa Pulong, o Hiniusang Pag-ampo; kon mahimo, ubanon/ubanan sa pagtambong sa sunod nga kasaulugan.

Source: TAMDANAN SA PAMALANDONG UG PAG-AMPO ALANG SA PAGPANGANDAM SA PAGSAULOG SA IEC UG TUIG SA MGA KABOS. Contact for orders the Diocesan Liturgical Center (Doña Aurora St., Digos City) or e-mail: dlcdiocese.digos@yahoo.com