Y Man?

Ang Vaticano II kusganon nga mipatamod pinaagi sa iyang dokumento Lumen Gentium #11 nga ang Yukaristikanhong sakripisyo mao ang tinubdan ug kinauyokan sa Kristohanong kinabuhi.

Ang Dabaw adunay 1.4 milyon nga Katoliko sulod sa 37 ka parokya, ug sa kapin 1,700 ka mga Gagmay’ng Kristohanong Katilingban kon GKK, apan sumala sa survey pipila lamang kanila ang nagpakabana sa pagsimba?

Y man? Asa na man ang uban?

Ginaingon na ang Yukaristiya mao ang tinubdan sa tanang pangsangyaw sa Ebanghelyo, ug ang ubang sakramento. Ang tanang katilingbanong ministriya, ug buhat sa apostolado nabugkos diha sa Yukaristiya ug kining tanan diha gayud paingon niini.

Y man, nga nabulag kini nga kabahin sa atong kinabuhi? Nganong dili nato kini mapahibalik diha sa ensaktong luna o kahimutangan sa atong kaugalingon ingon nga tinubdan ug uyokan sa Kristohanong kinabuhi? Kon ang Yukaristiya himulag sa matag adlaw sa atong kinabuhi, imposible alang kanato ang pagsinati niini ingon nga kinapungkayan sa atong Kristohanong kinabuhi.

Y man? Lisud ba ng pag-ila niini nga kabahin kini sa atong kalipay, pag-antus, paningkamot, lulinghayaw, kalampusan,ug kapakyasan?

Sunod tuig himoon sa Cebu ang dakong panagtigum kabahin sa Yukaristiya. Pipila pa ba ka Yukaristikanhong Kongreso ang himoon aron mabag-o ang atong kaugalingon diha sa panglantaw sa Yukaristiya?

Kon matinud-anon lamang kita sa pagpaningkamot sa paghimo sa Yukaristiya ingon nga uyokan sa atong Kristohanong kinabuhi, nan atong masinati kini ingon nga tinubdan sa maong kinabuhi. Kay sa diha nga ato lamang ablihan ang atong kaugalingon sa paghatag ngadto sa Ginoo, mapuno kita sa kahupong sa grasya sa iyang kamanggihatagon sa kaugalingon ug wala na’y “Y man” nga magpabilin sa atong galamhanan. (Nalds Villodres | SMP-Buhangin SoCCom)