‘Shelter for Lumad’, Tabangan

Ang proyekto nga “Shelter for Lumad” gidonar sa Dominican Fathers sa Indigenous People’s Apostolate (IPA) isip tabang sa mga iskolars nga Lumad particular na sa Ata Paquibato Calayag Organization (APACO). Kini nahimutang Daplin sa Sapa (DapSa), Bucana niining dakbayan. Pipila ka nag-eskwela sa University of Mindanao (UM), Christian Colleges of Southeast Asia (CCSA), ug sa University of Southeastern Philippines (USeP) nga mga lumad ang nakasinati sa kamaayo niini nga proyekto. Ang Campus Minister sa UM nga si Ms. Erma Caquilala ang nagdumala kanila, usa usab ka lumad gikan sa Surigao.

Matud pa sa Director sa IPA nga si Fr. Jun Acedo, “ang ato lang diri kay makatabang ta sa ginagmay na pamaagi.” Aduna silay bugas kada bulan na ginahatag ni Ms. Anna Layog sa Mintal pinaagi sa Caritas. Nagatinabangay na sila as a community para sa ilang suga, tubig; anaa pud na sila’y kaugalingon na balaod; mga gina observe na rules.”

Sa matag adlaw, ang kalisod sa mga iskolars mao ang pamasahe padulong sa eskwelahan. “Kulang ilang mga pamiliti permi; kada adlaw. Ang atong ginahatag bugas ra ug sud-an. Daghan kayo sila og mga needs,” dugang pa ni Fr. Jun.

Gikan sa tribong ata sa Malabog, Paquibato District si Glenn Ensing nagkanayon, “Challenged kaayo ko kung unsaon namo pag eskwela nga wala’y pamasahe; unsa-on pag exam sa usa ka semester nga wala’y pambayad.” Apan kini wala nahimong babag kang Glenn aron magpadayon sa iyahang pag eskwela.

Matud niya, “maayo na lang og aduna ka’y makasugat nga tao na but-an kaayo. Maong mapasalamaton gayod ming mga iskolars sa balay nga tabang sa IPA.” Sugyot ni Glenn, “Importante jud ang balay; mao jud na ang una. Kay lisod og wala kay kay puy-an.”

Programa sa IPA isip usa ka pastoral agency sa Arkidayosis sa Dabaw nga tabangan ang mga Lumad nga high school ug college scholars. “Sa high school, Adopt-a-Lumad ang tawag diin aduna’y naga sponsor para kanila ug sa College, Katawag sa Lumad (KasaLu) ang ngalan. Ang mga Friends nato na naga expose didto ga-contribute to their own capacity. Kining mga Lumad, nag contribute pud ni sila.

Dili lang ang istrukturang balay ang proyekto sa IPA. Gawas sa puy-anan og pagkaon, “naga undergo pud sila ug formation. “Mao ni ang programa sa atong Archdiocese of Davao through IPA. Ang benepisyo sa atong mga kaigsuonang Lumad mao nga makahuman ug eskwela; mapaangat sila unya mas mo-widen pa ang ilang panglantaw nga ang tawo dili siya ma discriminate; nga ang tao is important.”

Panapos nga mensahe ni Fr. Jun sa mga iskolars nga, “magtinabangay unta sila ug mamahimomg suporta sa matag usa.”

Alang sa mga buot mutabang, abli ang IPA aron sa pagdawat.