PBB sa Vocation Jamboree

Gihatagan sa Dayosis sa Digos ug usa pa ka kahulogan ang akronim nga “PBB,” usa ka titulo sa reality TV show aron dali ra makahinumdum ang mga batan-on nga miapil sa Vocation Jamboree 2015. Kini nga gipahigayon sa Cor Jesu College gymnasium, niadtong Domingo, Oktobre 18.

Subay sa temang: “Pagpakadatu sa Bokasyon Batan-on,” nagsugod ang kasaulogan pinaagi sa usa ka parada nga giapilan sa mga batan-on gikan sa mga bikaryato ug mga eskwelahan.

Ubos sa pagpanguna sa Vocation Director Rev. Fr. Marvin Zamora, ang tibuok adlaw gilangkuban sa input gikan sa Executive Secretary of the CBCP Episcopal Commission on Vocations ug National Coordinator of the Directors of Vocations in the Philippines, Rev. Fr. Joel Francis Santos Victorino. Iyang gipunting ang kamahinungdanon sa paghatag ug pagtagad sa mga kabus ug tamang pagamit sa kwarta ug grasya. Siya pud ang nangulo sa misa.

Nalingaw usab ang tanan sa “That’s my Saint Pageant,” diin nagtigi ang 17 ka mga batan-on sa ilang pasundayag sa kinabuhi sa lain-laing mga santos. Midaug ang St. Michael the Archangel gikan sa Diyosesis sa Digos sa bikaryato sa Matanao Parish. Dayag nga gikalipay nila kini sanglit miapil man sab ang mga pari, madre og brothers.

Tumong sa Vocation Jamboree nga mapa ila ila ang matag kongregasyon sa mga batan-on aron mas giyahan sila sa pagpili sa ilang bokasyon, relihiyoso man o kaminyuon. (Photos and Text: Nemric Kiel Umali │ Willybeth Salutillo)