Parokya Benepisyaryo sa Fun Run

St. Joseph Parish

Sa ikatulong higayon, gipahigayon sa Lokal nga Panggamhanan sa Sta. Cruz, Davao del Sur ang The South Race 3 niadtong Oktubre 4, 2015 didto sa atubangan sa munisipyo gikan alas singko ang takna sa buntag. Kabahin ang Race sa ika-131 nga kasumaran sa lungsod sa Sta. Cruz.

Nakig alayon ang lokal nga panggamhanan sa grupong St. Joseph Runners (SJR) aron maoy modumala sa aktwal nga lumba sa dagan. Ikaduha na kining higayon nga ang SJR maoy partner sa LGU sa teknikal nga aspeto sa dula. Naningkamot ang SJR nga makatigum ug pondo aron ihatag kini sa parokya sa San Jose sa tinguha nga makatabang sa kasamtangang konstruksyon sa maong simbahan. Kabahin usab sa matigum nga pinansyal ang himuong pundo sa grupo aron masuportahan ang panginahanglanon niini ug ang uban pang mga umaabot nga kalihukan.

Adunay tulo ka mga kategoriya ang dula lakip ang 3K, 6K ug 12K. Duna usab kategoriya nga Family Run, Kiddie Run, Barkada Run ug Inter-School Run. Mikabat sa 900 ka mga runners ang misalmot niini gikan pa sa nagkalain laing lugar sa Mindanao. Matud pa ni Oliver Enot, presidente sa SJR, adunay mga kabag-ohan sa dula karong tuiga gumikan nga gidungagan nila ug bakilid nga porsyon ang rota sa 12K aron mas malingaw ang mga sumasalmot. Dugang usab niya nga nanghinaut ang ilang grupo nga bisan sa ginagmay nga paagi makatabang sila sa pagpahuman sa konstruksyon sa St. Joseph Parish. Dunay cash prize nga nadawat ang mga midaug sa maong dula. (Julius Paner | Sta. Cruz)

‘Laudatu Si’ gilusad sa Matanao

Dungan sa unang adlaw sa bulan sa pagsaulog sa Balaang Rosaryo, gilusad ang ‘Laudato Si’ diin 100 ka mga punoan sa Mahogany ang gitanom sa bakanteng luna sa Kapoc Elementary School, Matanao, Diyosesis sa Digos.

Ang maong paglusad gipanguluhan sa San Vicente Ferrer Bangkal Parish Priest, Rev. Fr. Allan Joie T. Nuñez, PSAM Coordinator Mrs. Aurora Benemerito, kapitan sa barangay Hon. Grace S. Juntilla, mga kagawad, ug mga maestra ug maestro sa napiling skwelahan.

“Kami malipayon nga nidawat sa maong hagit nga diri itanom ang mga kahoy kay kini dili lamang alang namo kundili alang usab sa kaugmaon sa tanan ug sa umaabot pa nga henerasyon,” matud pa sa School Principal Mrs. Elizabeth Martel.

Si Padre Nuñez nagpahinumdum sa iyang misa nga kung unsa ang buhaton sa tawo sa kinaiyahan, mao puy buhaton sa kinaiyahan niya.

Ang ‘Laudato Si’ ikaduhang sulat pastoral ni Santo Papa Francisco nga mipunting sa pag-atiman sa kalibutan isip atong inahan. (Kieth Ivone Albarando)