Pagtuo Gasa sa Diyos

Ika-30 nga Domingo sa Ordinaryong Panahon
Jer. 31:7-9/Ps. 126/Heb. 5:1-6/Mk. 10:46-52

Sa Ebanghelyo karon, ang Diyos sa Kaayo, Gugma ug sa Kaluoy, (Exodus 34:6) nagpadayag, pinaagi sa PAGTUO, ngadto sa usa ka kabus, buta ug makililimos nga si Bartimaeus ang anak ni Timaeus.

Sa kinahiladmang bahin sa kasing-kasing ni Bartimaeus, milanog ang usa ka dakung grasya ug gugma sa Diyos, pinaagi sa Balaang Presensya ni Jesu-Kristo ang Bugtong Anak sa Diyos diha sa Iyang Buhat-Ministriya.

Kining maong presensya ni Jesus, nakapatandog ug nakapausab sa iyang kaugalingong kinabuhi, sa huna-huna ug kasing-kasing. Ug labaw sa tanan, nakapaaghat kaniya sa pagpadayag niini, diha sa diwa sa pagka maisugon ug pagkamadasigon. “Jesus Anak ni David Kaloy-I intawon ako!” (Mark 10:47)

Unsay nahatag sa maong Pagtuo? Nindot, nga atong hinumduman pag-ayo, mga igsuon, nga ang maong pagtuo, ni Bartimaeus, wala lamang nagpabilin sa sulod sa iyang kasing-kasing, kon dili, sa kadasig, iya kining gipadayag ug gisangyaw sa walay kahadlok ug kaulaw.

Tinukmod sa dakung gugma, ang pagtuo ni Bartimaeus, nag-ayo kaniya sa hingpit, lawasnon ug kalagnon nga pagkabuta. Ug tungod niini, iyang nakit-an, ug natagamtaman, ang dakung Kaluoy ug Gugma sa Ginoo diha sa iyang kaugalingong kinabuhi. “Ang Imong Pagtuo Nag-ayo Kanimo!” (Mark 10:52)

Sa kadako sa maong pagtuo, nahimo kining susi or yawi, nga diin, mabuksan in Bartimaeus and dakung pultahan sa Kaluoy sa Diyos Amahan alang kaniya. (The Great Holy Door of God’s Mercy! cf. Luke 6:36) Sa katapusan, ang kabalaan sa maong pagtuo naghimo kini kaniya nga boutang alagad sa atong Ginoong Jesu-Kristo.

Unsay atong matun-an sa Ebanghelyo karon? Uban ni Bartimaeus sa Ebanghelyo karon, isip mga binunyagang mga Katoliko Kristiano, sumusunod ug mga alagad ni Kristo. Ato usab nga patalinghugan ang bulaang Pulong sa Ginoo, diha sa atong mga kasing-kasing ug hunahuna. Atong tugutan nga ang gugma ug kaluoy sa Diyos sa kanunay magalihok ug magagiya sa atong kasing-kasing ug huna-huna.

Magdilaab unta ang maong gasa sa pagtuo ug gugma, kaluoy ug kaayo, sa sulod sa atong mga kasing-kasing, ug mag-umol kanato sa tinuod nga pagbag-o sa kinabuhi uban ni Kristo Jesus (cf. Gal. 4:19, Eph. 4:23-24: conversion of life in Christ) Kining pagtuo nga atong gihuptan, maghimo unta kini kanato nga mga buhing saksi ni Kristo sa Pulong ug sa buhat nga maayo. Kay ang Kasulatan nag-ingon man: “Ang Pagtuo nga walay maayong Buhat patay man kini.” (cf. Santiago 2:14,24,26)

Maghimo unta kining giya ug gabay sa atong inadlaw-adlaw nga pagkinabuhi, sa atong pagsunod Kang Kristo, diha sa diwa sa pag-alagad sa Diyos, sa Iyang Simbahan, nga mao ang katawhan sa Diyos. Ug sa katapusan, mga igsuon, uban ang grasya sa pagkamapadayunon, kining atong pagtuo, paglaum ug paghigugma, angay natong sayron, nga magpadangat kini kanato ngadto sa Gingharian sa Langit uban sa Ginoo, hangtud sa kahangturan. Amen. (cf. Rev. 14:13) (Fr. Jorge S. Angga)