Managlambigitay sa Bulan sa Misyon

Niining bulan sa Oktobre, makadungog gayud kita og wali o hisgot-hisgot, komperensya ba kaha, o balita bahin sa misyon. Kini tungod kay bulan man karon sa misyon sa Simbahan.

Misyon sa mga Magtutudlo
Pahalipayan nato ang mga magtutudlo sa atong mga tulunghaan kinsa nagsaulog sa ilang National Teachers’ Day karong Oktobre 5.

Sa gamay pa ako, giila gayud namo ug sa akong mga ginikanan nga ang among mga magtutudlo sa tulunghaan, ika-duhang ginikanan namo. Dako kaayo ang pagtahod namo kanila. Ug tinuod gayod usab nga mga talahuron gayud silang magtutudlo.

Nasayod kitang tanan nga dili gayud sayon karon ang kahimtang sa mga magtutudlo. Daghan silang kompitensya — ang Media, ang teknolohiya, ilabi na ang internet, ang modernong kultura. Nagkinahanglan silang ligdong, maalamon, mabination, makugihon. Dako ug daghan silang mga kaakuhan ug tulubagon, dili lamang sa tulunghaan, kon dili diha usab sa ilang mga pamilya.

Busa, pasalamatan nato ang atong mga magtutudlo, i-ampo sila, ug suportahan usab sila sa kanunay. MABUHAY ANG MGA MAGTUTUDLO!

Misyon sa pag-amoma sa kabuhatan
Magpista na usab kang San Francisco de Asis sa Oktobre 4. Malipayong Piyesta sa mga igsoon nato sa parokya sa Banate ug sa Maa.

Ubos sa pag-awhag ni Papa Francisco diha sa iyang Laudato Si, nga atimanon nato ang pinuy-anan natong tanan, mapuslanon nga balikon nato ang daan natong paningkamot kaniadto, balikan ug buhion pagusab. Mga paningkamot sa pamilya bahin sa “food sufficiency” pinaagi sa “faith gardening. Ang mga gipasiugdahan nga GKK “plant and tree nursery.” Ang sakto ug mapahimuslan nga pag-atiman sa atong basura. Paghunong sa pagmina sa mga watersheds ug vulnerable environments.

Basin usab makatabang sa pagbuhat kining gisugyot sa Franciscans for Ecology nga PANAAD NI SAN FRANCISCO:

Kami nagasaad
Nga MAGAMPO ug mamalandong bahin sa kaakuhan alang sa kabuhatan sa Dios ug sa pagpanalipod sa mga kabus ug kanila nga anaa sa peligro.
Nga magtuon ug magtudlo sa uban bahin sa mga hiningdan sa pagkambyo sa klima ug sa mga kadaot niini sa kinaiyahan ug sa tawo.
Nga MAGSUSI sa mga paagi nga kami, diha sa pamilya, sa parokya, sa katilingban ug sa mga hugpong sa mga tawo, nagatampo sa pagkambyo sa klima, pinaagi sa among paggamit sa enerhiya, pagatiman sa basura, ug paggamit sa mga butang sa kinaiyahan.
Nga MOLIHOK sa pagbag-o sa among mga batasan ug binuhatan aron sa pagpagamay sa among tampo sa pagkambyo sa klima.
Nga MANGAMPANYA kami alang sa mga Katolikong baroganan ug mga prioridad, diha sa mga paghisgot-hisgot sa pagkambyo sa klima nga dako’g kadaot nga nahimo ngadto sa mga kabus ug labing namiligro.

Ayaw dauta ang mga Lumad
Sa atong mas mahigugmaong pagamoma sa kabuhatan nga atong gikabuhian nga tanan, dakong bahin niini mao ang mga hagit, hulga ug kahigayunan alang sa atong mga igsoong lumad. Sila nga labing duol kaayo sa kinaiyahan.

Ang Simbahan sa iyang pagsangyaw sa Ebanghelyo, nagapadayon nga mopanaw uban kanila alang sa katumanan sa ilang ginamithi — ang pagpanalipod sa ilang yutang kabilin ug pagamping pagpatunhay sa ilang kaugalingong kultura, samtang nagatuon usab sa pakiglambigit sa kultura sa kadaghanan.

Tungod niini, aduna kitay Dominggo sa mga Lumad sa Oktobre 11. Ang tuyo niini mao nga kitang mga dili lumad magduggang ug sabot, pagtahod ug paghatag bili sa mga Lumad. sa ingon makatabang kita ug mosuporta kanila sa ilang mga gitinguha imbis nga magtamay ug magsalikway ug magdaogdaog kanila, sama sa binuhatan karon sa daghang dili mga lumad.

Pasalamatan ug palabihon pa gayod nato ang atong kaugalingong Apostolad uban sa mga Lumad diri sa atong diyosesis. Kamo nga naa sa “front line” sa pakiglambigit sa mga Lumad, mapanalanginan pa gayod unta sa dugang supporta spirituwal ug materyal.