Lumad sa Matanao gihagit di kalimtan ang kagikan

Kapin 70 ka mga Lumad ang milugsong sa St. Michael Parish sa Matanao gikan sa Brgy. Saub, Towak ug Colonsabac aron makigsaulog sa Domingo sa mga Lumad kon Indigenous People’s Sunday niadtong Oktobre 18, 2015. Gipasalamatan sa kura paroko Rev. Fr. Antonio C. Sila, D.C.D. ang B’laan sa ilang pakigduyog sa maong selebrasyon sama sa pagpasundayag sa ilang nagkadaiyang tradisyon.

“Kinahanglan atimanon ug panggaon ang kinaiyahan ug dili kini pasipad-an kay kini ang tinubdan sa kinabuhi sa katawhan,” saysay ni Fr. Antonio. “Ang kultura ug tradisyon sa mga Lumad mamiligrong mawala gumikan sa daghang mga hagit ug pagsulay ilabina niining modernong panahon…dili angay’ng ikaulaw ang ilang pagkatawo taliwala nga mga pagdaug-daug ug diskriminasyon. Atong tun-an ang kabataan aron magpabilin kini kay pipila sa mga kabataang Lumad dili na moila sa ilang kagikan ilabina kon makaadto nag syudad tungod kay maulaw na o kaha mahadlok sa mga pagtamay sa uban.”

Gipanghinaut nga ang maong selebrasyon magpadayon nga pasidunggan ang mga Lumad. Ang maong pagsaulog gitapus pinaagi sa usa ka simpleng salo-salo agi’g pasalamat sa kalampusan. (Jonifer Bangaan | Matanao)