Lumad: Bililhon, Hinimo sa Diyos

Gisaulog sa Kilegbeg Mission Station, Sta. Maria, Davao del Sur, diin kadaghanan gikan sa tribung Tagakaolo, ang “Adlaw sa mga Lumad” niadtong Oktobre 12 subay sa temang: “Lumadnon a page-eya: Kyauntangan dun-I Tenga na Manga Kasidap.” (Lumadnong Kinabuhi: Bulahan Taliwala sa mga Hagit).

Ang mga partisipante mao ang mga datu sa nagkalain-laing mga barangay, layko ministro, katekista gikan sa upat ka sona sa maong Mission Station. Tumong sa kasaulogan mao ang pagpahinumdom nga tanan lumad sa kaugalingong lungsod ug nga ang tanan hinimo sa Ginoo sama sa iyang kaugalingong imahe.

Ang aktibidades gisugdan sa usa ka misa nga gipangulohan ni Rev. Fr. Jomar P. Momo, DCD (KMS Priest in-charge) ug gisundan ug parada sa mga partisipante. Gisugdan ang programa sa “panawagtawag” o pasiunang pag-ampo nga gipangulohan ni Pedro Antic, ug mga layko ministro sa liturhiya.

Gisaysay usab ang kaagi sa pagkatukod sa Kilegbeg Mission Station ug ang kalamboan sa mga lumad sa maong lugar. Naghatag usab si Datu Godofredo Carmen, ang Municipal Tribal Chieftain ug pahinomdum kabahin sa Indigenous People Rights Acts Law (IPRA) isip paghatag ug gahum o dakong katungod sa mga lumad sa ilang kaugalingong luna.

Nagpasundayag ang mga kabatan-onan sa ilang talento sa pagsayaw ug pagsaysay ug mga sugilanon. Ila usab gibalik lantaw ang tradisyon sa Tagakalo sa Courtship/Marriage na ginatawag nila ug ”pagpanamong/pagpaipid”, sambuaga, ug “pagtatuluray sa kaluluwa” o reconciliation of families. Nagkasadya ang tibuok katawhan sa “community dancing” diin ang tanan giawhag sa pagpasundayag sa ilang talento sa pagsayaw.

Sa katapusan, naghangyo ang usa sa mga hosts nga si Brgy. Kapitan Ramilo F. Mangayao nga mupartisipar gihapon ang tanang lumad sa Sta. Maria sunod tuig. (Denny Luz V. Franca | Diocese of Digos)