Kompirmasyon, Gipasabot sa mga Kabataan

“Ang final action sa pagluwas kanato mao nga gipakita ni Kristo nga siya gibugal-bugalan ug gilansang sa krus. Apan gipildi ni Kristo ang kamatayon tungod sa pagkabanhaw,” bungat ni Yanong Muloy sa 69 ka batan-on sa wala pa sila gikompirmahan sa parokya sa San Miguel-Marahan, niadtong milabay nga bulan.

“Palangga kita sa Diyos, anaa ang Diyos kanato sa pagtoo, kung pasudlon ang Ginoo (sa atong pagtoo), then we become like Christ,” dugang pa sa Arsobispo. Ug aron masabtan pa sa mga bata ang kahulogan sa Sakramento sa Kompirmasyon, iya usab gipasabot nga ang pagkaanaa sa Dios magsugod sa Bunyag diin, “giangkon kita sa Diyos, anak kita sa Diyos.” Sa Kumpirma, “pasudlon sa Dios ang Espiritu Santo sa atong kinabuhi. Gilamdagan ang naa na nato. Gibunyagan ta. Gihatag na tanan. Sa Sakramento sa pagkompirma, gitultulan ta. Busa, ipa operate ang naa sa sulod.” Sa pagpasayon pa g’yud, iyang gikuha ang iyahang cellphone ug misaysay nga sama niini duha ray permanente nga ginagamit – ang text ug tawag, apan duna pay mga features nga p’wede pang ipa-operate. “Pinaagi sa kompirma, mamahimo kitang adult Christians; isog mubarog; mga saktong Kristiyanos aron ang Espiritu mutoltol kanato sa paggamit sa gasa nga anaa na nato,” panapos niya.