IEC Symbol: Gugmang Tiunay sa Yukaristiya

Ang bikaryato sa St. James ang unang midawat sa pagbisita sa 51st International Eucharistic Congress (IEC) Symbol dinhi sa Archdiocese of Davao, niadtong Septembre 29.

Una kini gidala sa parokya sa St. Joseph, Sasa, miagi usa kini sa parokya sa St. John the Baptist, Lasang gikan sa Diyosesis sa Tagum. Gisaksihan sa mga parokyano ang paraliturgy ug song animation nga gipasiugdahan ni Fr. Joel Caasi ug staff sa Archdiocesan Liturgical Center (ALC). Pagkahapon, gikuha sa kura paroko, Fr. Diony Tabiliran ug mga lideres sa parokya sa St. Joseph ang naasoy’ng Simbolo gikan sa Lasang. Didto gipahigayon ang rito sa pagdawat. Gipasabot pud sa Committee on IEC symbol nga si Ms. Jennie Marie Carba ang kahulogan sa simbolo. Human niini, ang mga pilgrims sa bikaryato nag motorcade paingon sa St. Joseph the Worker Parish, Sasa samtang ang mga batan-on sa Tibungco, Bunawan, ug Holy Cross College of Sasa nagkaway-kaway sa ilang mga flaglets timaan sa kahinangop sa pagdawat sa IEC symbol.

Gisaulog ni Abp. Romulo G. Valles, D.D. ang Welcome Mass. Gihagit niya ang tanan sa pagpamalandong sa gasa sa pagtoo. Nanghinaut sab kini nga ang Yukaristiya iuban sa matag-adlaw nga panginabuhi. Nagpalawom usab ug pagpasabot si Rev. Fr. Apolinario Ty, SS kabahin sa ‘Yukaristiya ug Misyon.’ Pagkahuman, gihimo ang behilya sa matag oras. Adunay mga grupo nga miangkon sugod sa alas 8 hangtud alas 4 sa kaadlawon bag-o pa man kini gihatud sa San Pedro Cathedral, niadtong Septembre 30.

Sumala pa ni Sis. Beth Donasco dili niya masabtan ang iyang kaugalingon sa dihang gibagting ang kampana sa pag abot sa simbolo. Pamati niya nga naa gyud si Kristo nga miabot.

“Nanlibawot akong mga balahibo ug nalipay kaayo. Hilabihan nakong kalipay kay tinuod man g’yud nga anaa si Hesus miduaw kanako. Gibati ko lahi ra g’yud sa mga bihilya nga akong gitambungan,” kini matud pa sa usa ka lay minister nga si Rene Rosales. Walo na ka tuig siyang nagserbisyo.

Human sa vigil, si Nanay Mila Campomanes, 72 anyos nagkanayon, “Mura ko ug gibayaw sa langit. Si Kristo g’yud ang akong gikaatubang. Salamat kay gihatagan ako niining higayon.” Sa pikas bahin, gisayangan ang kanhing miyembro sa Liturgy Committee nga si Angie Cagaanan kay “…gamay lang ang nakasinati sa talagsaong higayon. Sayang kay daghan ang wala pa gayud makasabot ug nagatuo kang Hesus.”

Ang Liturgy Committee Coordinator, Brod. ug Martin Atinen, Jr. nagpasalamat sa St. James ug IGACOS Vicariates, sa mga parokyano tungod sa mainitong pagdawat ingon man sa tanang mga parish priests nga nahimong kabahin sa kalampusan sa pagbisita dinhi sa IEC symbol.

Nga nagkanayon, gisugdan kini niadtong Octobre 29, 2014, didto libot sa Archdiocese of Cebu, ngadto sa tibuok Visayas, Luzon ug karon sa Mindanao, gikan sa Cagayan, Surigao, Tagum ug karon ania sa Davao City hangtud sa Oct. 03. Matud pa ang katuyoan nga gipanawduaw ang IEC symbol aron ang tibuok nasud nga Pilipinhong magtotoo makahibalo nga kabahin ang tanan sa pagpangandam sa kalihukan sa umaabot Inero 2016 ngadto sa Cebu. Aron usab malig-on ang pagtoo nga kining espirituhanong pagbisita sa simbolo mismo si Hesukristo,ang buhing presensya ang atong ikahibalag ug nag-awhag sa pagbalik ngadto kaniya kay Siya mismo ang sentro sa kinabuhi sa matag magtotoo ug usab aron sa paghangyo sa tanan nga maghalad og mga pag-ampo alang sa kalampusan ug mapatunhay sa IEC.

Ang simbolo nagpahinumdum sa sa unang kristianismo didto sa Cebu, Sulod sa simbolo anaa ang replica sa Cross sa kadaugan. Ug sa sulod anaa ang buhing presensya sa Yukaristiya. May upat ka imahen, sa atubangan si San Pedro Calungsod ug sa tuo nga kilid si San Lorenzo Ruiz sila ang duha ka Pilipino nga Santo milahutay diha sa Pagtuo ug gipili ang kamatayon aron sa pagpanalipod sa Yukaristiya, sa wala nga kilid ang Birhen Maria, ang inahan gayud ni Hesus, sa inahanong gugma, nag-atiman sukad pa sa iyang putling pagpanamkon hangtud sa tiilan sa krus ug sa likod nga bahin si San Jose ang Iyang Ama-ama, sa iyang mapinanggaong pagbantay sa batang Hesus. Niining upat ka minahal ni Hesus maoy tigpanalipod kaniya samtang nagapanaw-duaw sa tibuok nasud. (Carmen Timario | Amie Desquitado | SJP SoCCom)