Guihing Caritas Sugdan na ang Livelihood Projects

Duyog sa umaabot nga selebrasyon sa ika-40 ka tuig sa pagkahimugso sa Caritas, ang Parish Social Action Ministry (PSAM) sa Our Mother of Perpetual Help (Guihing), nag-ipon ug pwedeng maapod-apod sa mga pamilya nga mas nanginahanglan.

Misyon sa maong grupo nga maka-ipon ug 50 ka sako nga bugas, de-lata, kape, asukal, atbp. Sa kasamtangan, aduna nay natigom gikan sa mga manggihatagon nga napulo ka sakong bugas, 3 ka kartong noodles ug sardinas, lakip na ang usa ka sako nga asukal nga andam nang ibahin-ibahin alang sa 40 ka pamilya nga sakop diri nga parokya.

Sumala kang PSAM coordinator Emma Baric, naningkamot sila pagsolicit ug pagpangayo ug tabang sa mga naay igong katakus sa paghatag. Tuod man, ila nang napahigayon ang pagpanghatag ngadto sa mga kaigsoonang kabus sa miaging bulan. Ang in-charge sa livelihood program sa parokya nga si Nanay Charing Padrones nagkanayon nga paghuman sa pag apod-apod sa mga items ngadto sa mga napiling pamilya, mosunod na usab ang pagpanghatag ug livelihood projects nila sama sa pagbuhi ug mga baboy, kanding, baka, ug uban pa. Kini aron mahatagan sila ug panginabuhian nga haum sa ilang katakus. Dili maitandi ang pagpaningkamot sa mga PSAM members nga way puas sa pagpangita ug hinabang aron adunay katumanan ang maong plano. (Sem. Ariel Maglupay)