Dominggo Uban sa mga Lumad

Matag tuig sa ika-2 dominggo sa Oktobre ang Simbahan dinhi sa Pilipinas nagsaulog sa “Indigenous Peoples’ Sunday.” Kung naghunahuna mo nga alang lamang kini niadtong mga dapit diin anaay mga Lumad, nasayop gayud kamo. Ang tinuod, ginahimo kining kasaulogan alang niadtong dili mga Lumad. Ang tuyo mao nga ang mga dili mga Lumad makabaton og maayo nga pag-ila ug pagpakabili sa atong mga igsoong Lumad, mga Katoliko man sila o dili. Sa ato pa, makabaton ang tanang dili Lumad sa maayo, makatarunganon, ug mahigugmaong pakiglambigit ngadto sa mga Lumad.

Dinhi sa atong Diyosesis sa Digos, anaa ang mga Bagobo nga kasagaran diha namuyo palibot sa Mt. Apo sa Lungsod sa Sta. Cruz ug sa Digos City didto dapit sa Kapatagan. Naa kitay parokya didto sa St.Joseph ug sa Our Lady of Mount Apo.

Anaa usab kitay mga Manobo, nga atua kasagaran namuyo sa lungsod sa Don Marcelino ug Jose Abad Santos. Aduna kitay parokya didtong dapita — SanLorenzo Ruiz Parish ug Assumption Parish.

Anaa usab kauban nato ang mga igsoong B’laan nga atua kasagaran sa lungsod sa Malita, sa Kiblawan, Matanao ug sa Jose Abad Santos ug didto usab sa Sarangani. Ang Parokya sa Sto. Rosario, Little Baguio Mission Station, Immaculate Conception, ug sa Assumption ang atua niadtong dapita.

Ang mga igsoon natong mga Tagakaolo ang pinakadaghan tingali nga namuyo kasagaran sa lungsod sa Sta. Maria, Basiawan, Malalag, Malita, Don Marcelino, ug sa Jose Abad Santos. Ang parokya sa Assumption, Kilebeg Mission Station, Sto Rosario, Matamis Mission Station, ug sa San Lorenzo Ruiz.

Ug ang mga tribo nga gamay ra sila mao ang mga Kalagan sa may lungsod sa Hagonoy ug ang mga Sangil didto dapit sa Jose Abad Santos. Ang Parokya sa Mother of Perpetual Help, San isidro, ug Nuing Mission Station ang nakiguban kanila sa ilang gipuy-an.

Sa mga miaging mga katuigan, nasaksihan nato ang pagdaghan ug pagdagsang sa mga Badjao nga mga lahi pud kaayo kay sa uban. Kulang pa kaayo ang atong kahibalo bahin nila. Apan dili nato mahimong magpakabuta, bungol sa ilang kahimtang. Kasagaran makita sila sa Sta. Cruz, ug sa Digos City, ug uban pang dagkong lungsod.

Ang mga ginganlan nga mga Parokya sa ibabaw, nga nagapanaw uban sa mga Lumad, nagpadayag sa paningkamot sa Simbahan nga makig-uban sa mga katawhan nga nahiuna pa kay kanato niiining probinsiya nga atong gipuy-an karon. Salamat sa gipangusgan sa mga Misyonerong Langyaw kaniadto (PME FATHERS). Sila ang nanguna nga gipamatngon sa simbahang lokal, nga dinhi adunay laing katawhan nga lahi sa mga Bisaya, nga angay tahuron, alagaran, ug suportahan ang ilang panaglahi kanato, apan mahimong makaapil ug kabahin sila sa nahiusang katawhan nga nagalakaw padulong sa hingpit nga kinabuhi alang sa tanan.

Daghan kaayong salamat kaninyo nga karon maoy nagpadayon sa atong apostolado uban sa mga Lumad — mga Diosesanong Pari, ang Missionaries of Jesus, mga Redemptorists, mga SMEs, lakip na ang ilang mga relihiyoso ug laykong kaubanan. Ang inyong paning-ingnan nagahagit ug nagadasig kanamo nga mosunod sa inyong mga lakang sa Misyon.

Kadtong mga dapit sa Diyosesis nga walay mga Lumad apil gayud kamo sa Apostolado sa Simbahan uban sa mga Lumad. Unsay angay ninyong himoon?

Una, kinahanglan ang pagpakabana ug pagtagad sa mga Lumad nga anaa ra tingali sa inyong dapit apan wala lang tagai ug pagtagad. Nagkinahanglan mogawas kita sa atong naandang gipaningkamotan. Atong responsabilidad nga makisayod ug makig ila-ila kon anaa sila bisan unsa ka gamay o dako nga pundok.

Ikaduha, ang Pari nga magbalantay sa Parokya uban sa iyang mga kauban nga nangalagad sa Parokya maghisgot, mamalandong sa pagbuot sa Dios, magpahigayon sa mga angay buhaton ug sarang mabuhat. Ang gugma ni Kristo nag-aghat kanatong tanan nga molihok. Ang Ebanghelyo nagahulat nga malipayon nga mahubad sa pulong ug buhat uban ug alang sa mga Lumad.

Ikatulo, sa mga higayon nga adunay higayon nga makatampo sa Apostolado sa Lumad didto sa laing dapit, tagaan gayod ang katawhan sa higayon nga makaapil ug makatampo bisan unsa ka gamay. Busa responsabilidad sa mga nagdumala nga kinahanglan ipahibalo ug ipahigayon ang pag-apil sa katawhan. Sa ingon niini ang misyonerong diwa padayon nga buhi sa matag Kristohanong katilingban, kay ang matag Kristiyano, misyonerong sumusunod ni Kristo.