Day-to-day Vocation Campaign and Culmination of Vocation Month

Ang Diyosesis sa Mati pinaagi sa mga relihiyosong kongregasyon ug mga seminarista ang naghatag gayud sa ilang bug-os nga panahon sa paglibot sa tanang 19 nga mga parokya aron mopaambit kabahin sa kahulogan ug tawag sa Bokasyon, partikular ang tema karon nga nalambigit sa Tuig sa mga Kabus ug sa Kinabuhing Consagrada, ug ingon man sa kasaysayan ug ‘personal & community witnessing’ sa mga indibidwal nga nag-representar sa nagkadaiyang mga pundok o orden sa simbahan.

Sumala nila Diocesan Vocation Coordinator Sr. Eva Marie G. Tabugoc, CSJ ug Broadcast Media Coordinator Sr. Mary Len G. Alfeche, CM, gikan sa una hangtud sa katapusang semana sa Oktubre, walay puas ang pagbisita sa mga parokya aron ibutang ang mga posters sa bokasyon gikan sa managlahing mga kongregasyon, ug pagpulong o pag-istorya kabahin sa mga personal nga kasinatian sa kinabuhing konsagrada ug sa tawag sa pagserbisyo sa Diyos diha sa simbahan alang sa tanan. Kahinumduman nga ang tema ning tuiga mao kini “Vocation to Consecration Witnessing to the Poverty of Christ.” Hapit kada adlaw, buntag ug hapon, giduaw ug gipulungan sa daghang mga madre ang mga tinun-an sa mga pribado ug pampublikong Kolehiyo ug High School sa Mati, ug sa Gulf Towns — San Isidro, Luzon, Gov. Generoso, Lupon, Banaybanay, ug ingon man sa East Coast, sa Oktubre 21-23 nga gipasiugdahan sa mga seminarista. Gitakda ang kulminasyon karong Oct. 30-31 pinaagi sa usa ka Vocation Youth Jamboree sa St. Therese Gym, Clergy House Compound, Madang, Mati City.

Sa laing bahin, gipahinumduman ni Apostolic Administrator Fr. Edito “Ed” Baño ang katawhan nga nagsimba sa miaging domingo kabahin sa selebrasyon sa Mission Sunday, ug karong Oct. 25 ang Prison Awareness Sunday, samtang dungan sa kulminasyon sa Bulan sa Bokasyon, ipahigayon usab ang kulminasyon sa Bulan sa Santos nga Rosaryo. Gipadangat usab ni Fr. Ed ang iyang kinasing-kasing nga pasalamat sa tanan nga nagmakugo sa pagpromotar sa bokasyon, dungan sa paghangyo nga magpabilin gihapong maapoon alang sa gasa sa Diyos para sa dakong ani sa bokasyon sa pagkapari ug sa kinabuhing konsagrada. Nasayran nga ang mga Vocation Talks nagpasabot usab kabahin sa managlahing mga estado sa kinabuhi–ang kaminyoon, pagka-ulay, ug pagkapari o relihiyoso.