Bulahan

Solemnidad sa Tanang Mga Santos
Rev. 7:2-4, 9-14/ Ps. 24:1-6/ 1 Jn. 3:1-3/ Mt. 5:1-12

Ang Solemnidad sa tanang mga Santos gisaulog sa tibuok Simbahang Katoliko aron pagpasidungog sa tanang gideklara nga mga santos pinaagi sa kanonisasyon. Sila nagpuyo ug nagsaksi sa talagsaong kinabuhi sa mga birtud sa mga Bulahan ug sa mga mithi sa gingharian. Kini ilang gihimo sa walay pagpihig ug kinasing-kasing gayod.

Bisan tuod dunay daghang wala madeklara nga santo, apan sa hilum sila nagpuyo ug balaanong kinabuhi nga angay sundon. Sila usab matinud-anon sa ilang pagtubag sa tawag sa Dios, ang tawag sa kinabuhi nga balaan ug pagpakigsuod sa Dios.

Ang pagsaulog sa adlaw sa tanang mga santos nagdasig kanato. Taliwala sa mga hagit, kalisud ug mga pag-antus, molahutay unta kita diha sa pagkabalaan. Kay unsa may bili sa pag-antus kung human niining tanan kita makaambit sa bangkite nga langitnon nga giandam kanato sa atong Langitnong Amahan sa langit.

Sa Ebanghelyo mahitungod sa mga Bulahan, gihatagan ni Kristo ug dungog ug gipromotar ang mga mithi sa gingharian. Ang mga matinud-anon ug angayan nga mahimong anak sa Dios gitawag sa pagkabulahan. Kitang tanan gitawag sa pagkabulahan o sa kinabuhing malipayon. Kini atong maangkon kung atong puy-an ang kinabuhi nga angayan sa Iyang tawag ug atong atubangon ang mga hagit sa pagkabulahan.

Isip mga bahin sa Lawas ni Kristo nga nagsaulog sa adlaw sa mga Santos, kita nahiusa karon sa espirituhanong pamaagi sa tanan tang kaigsuonan. Lakip niining kahiusa nato sa mga atua na sa langit, ang Simbahan nga madaugon, ngadto sa mga atua sa purgatoryo, ang Simbahan nga nag-antus, ug sa tanang ania pa sa kalibutan, ang Simbahan nga nagapanaw.

Kitang tanan naglawig sa kasantos. Nasinati nato karon ang paghinlo ug pagbalaan sa kaugalingon aron mahimo kitang angayan sa tawag sa Dios. Dili sayon ug dili madali kining maong panaw, kondili, puno sa mga hulga, hagit, kabug-at ug kasakit. Apan uban sa makasantos nga grasya sa Dios, uban sa Iyang panabang, hustong kinaiya ug determinasyon, ang kinabuhi nga makasantos posible gayod nga makab-ot. Dili sayop ang mangandoy ug magdamgo nga masantos kung kita maningkamot gayod sa pagsunod sa lakang ni Kristo, sa Iyang mga gitudlo, panig-ingnan, kinabuhi ug sa pahimangno sa Ebanghelyo mahitungod sa mga bulahan, ang mithi sa gingharian.