Ang Pundo sa Simbahan alang sa Misyon

Ang ika-3 nga Dominggo sa bulan sa Oktobre, sa dugay na nga panahon, gitakda sa Simbahan nga Dominggo sa Misyon. Mao kini ang hinungdan nga karong dominggoha mabati nato nga ang mga pagwali sa mga Pari, mga tema sa pakigpulong sa nagkalainlaing hut-ong sa Simbahan, apil na sa mga tulunghaang Katoliko, magahisgot gayud sa atong kinaiya sa misyon — ang Simbahan MISYON.

Duna usab talagsaon nga ginahimo ang matag simbahan, pinasikad sa gimando ug gikauyunan nga buhaton sa tanang mga Obispo nga nagdumala sa lainlain diyosesis ug territoryo diin anaa ang Simbahan. Sa ato pa, OBLIGADO gayud ang tanan. magamay man o dako nga katilingaban. Ang TANANG KOLEKTA SA PANAHON SA MISA NIINING DOMINGGOHA itampo alang sa KINATIBUK-ANG PUNDO SA SIMBAHAN ALANG SA MISYON. Gikan sa maong hiniusang pundo, i-apodapod sa nagkalainlaing simbahang lokal nga nagsugod pa lamang o kadtong gamay kaayo pa nga dili pa sarang makatindog sa kaugalingon. Mao kini ang pundo sa nagkalambigitay nga Simbahan alang sa Misyon.

Namatikdan nato nga sa mga misa adunay regular nga kolekta alang sa panginahanglan sa parokya. Aduna usab spesyal nga kolekta alang sa partikuar nga katuyuan. Apan lahi gayud kaayo kining kolekta niining Dominggoha. Ang TANAN UG TIBUOK KOLEKTA itampo sa hiniusang pundo sa tibuok Simbahan.

Makausa ra ni matag tuig ginahimo sa Simbahan. Isakripisyo sa matag lokal nga simbahan ang kaugalingong panginahanglan, ug ihatag hinoon ang tanan alang sa kaayuhan sa ubang nanginahanglan. Magkahiusa kitang tanan niining Dominggoha, diha sa Spirito Santo. Klaro kaayo ang kalihukan, ang katuyuan, ug ang pamaagi.

Apan, ikasubo nato nga daghan pa sa atong mga kaigsoonang lideres sa Simbahan, ma Obispo man o Pari o laykong lideres nga wala pa nagmatinud-anon kaayo niini. Unsay hinungdan? Sila ray nahibalo. Apan basi sa tinuig nga report sa mga kolekta niining Dominggoha, nga gihimo ug gipadala, kahibulungan ang resulta. Dinhi na lamang sa DADITAMA, katingad-an ang resulta sa Kolekta nga gitampo sa matag Diyosesis. Itandi ang kolekta sa usag usa.

Ang unang magsusi sa maong hitabo mao ang mga yanong magtotoo. Padayon bang nagmapasalamaton sa gasa sa pagtoo bunga sa Misyon? Nahubad ba ang maong pasalamat sa pagkamanggihatagon sa kolekta alang sa Misyon karong dominggoha. Nganong gamay ra man ang gitampo sa matag usa ka diyosesis?

Ang ikaduha nga angay gayud magsusi mao ang mga nagdumala sa mga lainlain nga hut-ong sa simbahang lokal. Naghatag ba og saktong pagtagad sa pagdasig ug pagawhag sa mga magtotoo ang mga Obispo ug mga Pari ug Relihiyoso bahin sa Misyon? Gibantayan ba nila kung ang mga hingtungdan nagmakugihon gayud nga nagtuman sa mando bahin sa maong kolekta? Bisan unsa kamanggihatagon sa mga magtotoo, kon dili pud i-remit ang saktong kantidad sa bisan unsang katarungan, dili makab-ot ang katuyuan niining maong Dominggo sa Misyon.

Ang Kolekta karong tuiga alang sa Misyon modako pa gayud unta, timaan sa nabag-ong kamatngonan, hunahuna ug binuhatan. Himoon na lamang ang tinuod, ang angayan, ug magmanggihatagon. Ug kini igo na alang sa Ginoo ug sa Simbahan.

Sa tapusan, ubanan nato ang atong kamanggihatagon sa maintong pag-ampo. Ang atong adlaw-adlaw nga pagrosaryo ihalad nato alang sa tanang misyon ug sa tanang misyonero sa atong Simbahan.