Ang Bunyag sa Bata

DIHA sa balaang kasulatan ang atong Ginoong Hesukristo nagpasidaan nga ang bunyag gikinahanglan gayud nga madawat. Siya miingon “ang motuo ug magpabunyag maluwas” (Marcos 16:16). Diha sa Juan 3:5 siya miingon “Sultihan ko ikaw; walay makasulod sa gingharian sa Dios, gawas kon matawo siya pinaagi sa tubig ug sa espiritu.”

Sa wala pa siya mosaka sa Langit, siya naghatag ug katapusang pahimangno ug sugo sa iyang mga tinun-an sa pag ingon, “Panlakaw kamo sa tibuok kalibutan ug himoa silang akong mga tinun-an ug BUNYAGI SILA SA NGALAN SA AMAHAN, SA ANAK UG SA ESPIRITU SANTO” (Mateo 28:19-20).

Busa ang bunyag gikinahanglan gayud sa atong kaluwasan. Kini mao man ang pagpapas sa salang panulondon o original sin, usa ka sala nga napanunod nato sa atong unang ginikanan nga si Adan ug Eba (cf. Roma 5:12), ug aron nga makuha kini kinahanglan nga kita pagabunyagan subay sa giingon sa atong Ginoong Hesukristo (cf. Juan 3:3-5).

Ang mga bata natural nga walay salang aktwal, usa ka personal nga pagbuhat ug dautan nga subay sa iyang konsensya ug kabubot-on. Ang ila mao kadtong sala nga napanunod sa atong unang ginikanan nga mao ang salang panulondon, ug kini gi-pruybahan diha sa bibliya nga sa bata pa kita aduna nay kalapasan, “Dautan ako sukad ako gipahimugso, ug makasasala sukad ako gipanamkon” (Salmo 51:5). Bisan si Propeta Isaias nag-ingon nga “sukad sa atong pagkahimugso masupilon kamo” (Isaias 48:8). Mao nga kitang mga Katoliko mintras bata pa kita kinahanglan gayud pagabunyagan aron madawat nato ang grasyang makasantos ug mahimo kitang miyembro sa iyang lawas nga mao ang Simbahan. Ilhon na kitang Kristiyanos ug sinagup nga anak sa Dios ug makapanunod sa gingharian sa langit.