Urban Organic Gardening gitakdang ipakaylap sa mga GKK sa St. Francis of Assisi Quasi Parish

Isip tubag sa bag-ong sulat ni Santo Papa Francesco, ang Laudato Si, gitakdang ipakaylap ngadto sa mga Gagmay’ng Kristohanong Katilingban (GKK) ang Urban Organic Gardening ubos sa parokya sa St. Francis of Assisi Quasi Parish sa La Verna Subdivision, Davao City.

Duha ka mga banggiitang mag-uuma ang mibulontaryo sa ilang serbisyo ngadto sa kura paroko nga si Fr. Orlando Angelia, sa dihang dunay nakit-ang bakante nga luna atbang sa simbahan nga gilantaw nga mamahimong usa ka produktibo nga yuta.

“Mao kini ang silbing ‘showcase’ namo atol sa pag-abli sa semana sa kasaulogan sa ika-3 nga kapistahan sa St. Francis of Assisi Quasi Parish,” miingon si Fr. Angelia. “Gikinahanglan nato nga atong atimanon ang atong palibot, isip piniyalan sa gasa sa Ginoo ug ang atong pag-atiman sa isig-usa nga panglawas pinaagi sa pagkaon ug mga organic nga pagkaon,” dugang pa niya.

Gilauman nila ni Maxey Atog, 58 anyos ug PSKB sa San Lorenzo Ruiz ug ni Kagawad Sergio Uy, 60 anyos nga mag-uuma ug usa ka PSL, nga mamunga na ug maka-harvest sa ilang gitikad nga gamay nga lote atbang sa simbahan.

Si Atog kinsa ka-3 ka mananaog sa Gulayan ng Bayan sa City Agriculture Office, nagmugna sa gulayan pinaagi sa paggamit sa mga plastic nga mga botelya isip usa ka pamaagi sa pag-‘reuse’ kon subling paggamit sa mga basura gikan sa atong mga panimalay.

Gihimo usab nila ni Atog ug Uy sa maong gamay nga luna ang composting, kon ang paghimo ug organic nga abuno ginamit ang mga basura nga biodegradable nga maoy ilang gigamit nga pagpatambok sa ilang mga tanom. “Healthy ang produkto gikan niini tungod kay wala man kini kemikal,” si Atog nagkanayon.

Gitakdang iimplementar ang maong teknolohiya sa 15 ka mga GKKs sa parokya pinaagi sa pagpang-apod-apod sa mga binhi sa letsugas, petsay, upo, sibuyas, kamatis, talong ug uban pang mga gulay.

Sa pagkakaron, hinay hinay nga nakapahimulos na ang parokya sa bunga gikan sa maong gulayan. (Annie Libres)