Praying Nanays

Duha ka dekada ang gilay-on sa ilang edad, apan usa ra ka formula ang ilang gigamit aron mulahutay ang ilang mga anak sa bokasyon sa pagkapari: suporta og pag-ampo.

Sila Nanay Luisa “Isang” Tampon, 86, og Nanay Mely Lopez, 63, mga Marian devotees og maoy mga inahan nila Fr. Consurcio “Dondon” Lopez, Jr. (Parish Priest, Our Lady of Assumption Parish, Caburan) og Fr. Judito “Jude” Tampon (Administrator/Rector, Mary Mediatrix Cathedral Parish, Digos). Ang duha ka pari parehong ikalima sa mag-igsoon.

Magkalahi man ug reaksyon sa dihang nananghid ang ilang mga anak, apan pareho ra ug ending. “Wa ko kasabot sa akong gibati sa dihang miingon siya nako nga musulod siya. Mao nang gihilakan jud nako tong nag regency siya. Giundangan nako ang pag-ampo nga mapari siya. Apan sa dihang mibalik siya, gihilakan gihapon nako,” matud pa ni Nanay Mely nga mibalik-lantaw sa istorya ni Fr. Dondon. Sa pikas bahin, “Miuli si Jude sa balay nga malipayon. Ingon siya, ‘Nay, nakapasa ko sa exam sa seminaryo.’ Puno kami sa akong bana sa kabalaka tungod kay gusto namo nga siya mapari apan pobre man kaayo mi. Naay higayon nga gipadad-an nami ug suwat (Statement of Account) nga kon dili mabayran basig di na makapadayon.”

Apan, bisan pa man sa kapit-os ang mga anak milampos sa pag eskwela sa St. Francis Xavier College og Regional Major Seminary (REMASE) dala ang pinansyal nga suporta sa ilang mga inahan. Sila nag-uma, nanghornal og namasak aron lang makahuman ang ilang pinalanggang mga anak. Pangamuyo nila nga mulahutay gayud ang duha. Human sa ordinasyon sa pagka diyakono, nanamilit si Fr. Jude nga mudiskanso usa kay aron makatudlo og makatabang sa iyang pamilya, apan gidilian kini sa iyang Nanay Isang.

Sa karon, malipayon na sa ilang bokasyon si Fr. Dondon og Fr. Jude. Si Nanay Mely, cancer survivor man, nakahaw-as na sa kapit-os, samtang si Nanay Isang, padayon sa simpleng pagpuyo tinabangan sa iyang mga propesyonal nga mga anak. Ampo nila pareho: “Makalahutay og walay tentasyon nga mudangat kanila. Iampo ninyo ang mga anak pinaagi kang Mama Mary. Kay siya ang nag-uban kanila hangtud mapari sila. Kana daku nga milagro gyud.”