Pari: ‘Magpaubos, Maluoy’

“Service and Commitment,” mao ang topic nga gipaambit ni Rev. Fr. Leo Aporbo,T.O.R, speaker sa gipahigayong Lectors and Commentators’ (LECOM) Team Building sa Our lady of the Miraculous Medal Parish (OLMMP) sa Indangan, niadtong Agosto 31, 2015 didto sa Franciscan Friars ground, San Miguel, Indangan.

Matud pa ni Fr. Leo, ang mga LECOM adunay dako nga kalambigitan diha sa pagsaulog sa Santos nga Yukaristiya. Busa kinahanglan gayud ang matinud-anong pagserbisyo ug pagtahan sa kaugalingon diha sa pagsilbi sa simbahan, katawhan, ug sa Dios. Matud pa niya, isip “servants of God”, anaa gayud ang kinaiya sa pagkamapaubsanon ug pagkamaloloy-on. Kini sama sa kinaiya sa atong Ginoong Jesukristo diha sa iyang public ministry sa iyang pagtagad ug pag-ayo sa mga masakiton. Nanghinaut si Fr. Leo nga mao unta kini ang mahuptan ug puy-an sa mga nagserbisyo sa simbahan.

Human sa maong input misunod dayon ang mga games nga gipasiugdahan sa usa ka seminarista nga si Brother Jason. Adunay 3 ka mga games nga iyang gipahimo sa mga Lecom nga may kalabutan sa maong input bahin sa Team Building. Pagkahuman sa mga padula adunay pagpaambit sa mga kasinatian ug mitumaw ang mga nagkalain-lain nga mga pagbati. Ang uban miingon nga na-enjoy sila ug ang uban usab na- challenge. Sa katapusan ang maong kalihukan nagmalampuson ug daku ang kalipay sa mga miyembro sa LECOM tungod sa daghang pagtulon-an nga ilang nakat-onan. (Anabelle Encluna | OLMMP Soccom)