Pag-ampo kang Birheng Maria

Gud pm Sir, mangutana ko ngano ang Katoliko mag-ampo man kang Birheng Maria? 0910-9016***

“Ang pag-ampo nato kang Birheng Maria mao ang pagpangayo ug tabang kaniya. Wala naga-ampo ang Katoliko aron paghimong diosa kang Maria, kondili miagi lamang kita niya agi ug pagpangayo ug tabang sanglit siya man ang Inahan sa manluluwas.

Si Birheng Maria adunay dakong kalambigitan sa pagpangluwas sa Ginoo sanglit sama sa among ginaingon nga diha nagkuha si Ginoong Hesukristo ug lawas ug dugo nga maoy gigamit aron sa pagpangluwas sa katawhan (cf. Mat. 1:23, Gal. 4:4 ug Heb 10:9). Ug sa maong hinungdan kitang mga Katoliko mohatag gayud ug taas nga pagtahud kang Birheng Maria.

Kini subay sa giingon sa kasulatan, Lucas 1:48: “Sukad karon ang tanang tawo motawag kanako ug bulahan.” Walay lain nga nakatuman niini kondili kita lamang mga Katoliko, sanglit ang paghatag ug pagtahud kang Birheng Maria nagsugod kang Anghel Gabriel, ang mensahero sa Ginoo.

Siya midayeg ug mitahud kang Maria sa pag-ingon, “Maghimaya ka, Puno ka sa Grasya” (Lucas 1:28). Misunod usab pagdayeg ug pagtahud kaniya si Santa Elizabeth sa pag-ingon “Bulahan ka sa babayeng tanan, ug Bulahan usab ang bunga sa tiyan mo nga si Jesus” (Lucas 1:39-45).

Busa ato gayud hatagan ug dakong pagtahud ug pagdayeg ang Inahan sa atong Ginoo sama sa gihatag nga pagtahud sa Anghel ug mga unang Kristohanon. Kini makapahimoot sa Anak. Ang pagdawat kang Kristo nga atong Ginoo ug manluluwas, gisalikway ang Inahan, sama ra sa usa ka iro human gisabak ug giamoma sa Inahan inig dako gisalikway dayon. Kita adunay kalag og kaalam. Dili kita usa ka iro o mananap nga human sa tanan, mosalikway sa Inahan. Si Jesukristo bisan nagbitay siya sa Krus, nakahimo pa sa pagbilin sa iyang Inahan ngadto sa iyang mga tinun-an (Juan 19-26-27). Ingon-ana ang pagmahal ni Kristo sa iyang Inahan. Busa kong misimba kang Kristo, apan misalikway sa iyang Inahan, kawang lamang ang pagtoo, pagdawat ug pagsimba kang Kristo.”