Mga PSL sa Arkidayosis sa Dabaw Nibisita sa GKK San Pedro

Kapin 700 ka mga Pangulo sa Liturhiya (PSL) gikan sa Arkidayosis sa Davao ang nipahigayon ug panaw-duaw didto sa Gagmay’ng Kristohanong Katilingban (GKK) San Pedro Tuban, Sta. Cruz, Davao del Sur niadtong Agosto 29, 2015. Gilangkuban ang mga bisita sa 37 ka mga parokya sa Davao City inubanan sa ilang tagsa-tagsa ka mga Parish PSL Coordinators ug pipila ka mga Kura Paruko sama nila Fr. Severino Capulong, Fr. Herme Garcia, ug Fr. Joel Caasi nga nagsaulog sa Santos nga Misa.

Kabahin ang maong pagduaw sa pag selebrar sa ika-50 nga kasumaran sa GKK diin usab natawo ang Kasaulogan sa Pulong ug ang paghatag sa responsibilidad sa mga PSLs isip lider sa pagdumala sa Santos nga Eukaristiya. Mainiton nga gidawat sa mga lideris sa GKK San Pedro ang mga bisita. Gani, matud sa ilang president nga si Mrs. Estela Guindolman, ika upat na ka higayon nga gibisita ang ilang GKK sa pareho gihapong katuyuan.

Napili ang GKK Tuban nga maoy sentro sa pagduaw gumikan kay kini ang pinaka unang GKK nga namugna sa tibuok Pilipinas ug diri usab gipahigayon ang pinaka una nga Kasaulogan sa Pulong niadtong tuig 1957.

Sa panagtigum, gisaysay sa usa sa mga karaang lider sa GKK San Pedro nga si Epifanio Sabandal kung unsa ka lisod ang ilang naagi-an samtang sila nagsugod pa lamang sa ilang katilingban kaniadto. Si Mr. Sabandal ang pinakaunang presidente sa grupong Tuban Beach Youth Catholic Organization (TBYCO) sa dihang nagpangidaron pa lamang siya ug 17 anyos niadtong 1957. Matud niya, mahinugdanon alang kanila nga sila kabahin sa kinatibuk-ang pagkaylap sa Kasaulogan sa Pulong sa Pilipinas ug nahimong instrumento aron mas mapakusgan ang kalihukang GKK.

Dugang ni Mr. Sabandal nga kabahin sa mga hagit nga ilang natubag mao ang pag amuma sa ilahang GKK nga hangtud karon lig-on ug nagkahugpong. Presko pa kaayo alang kaniya ang ilang mga pagpanigkamot kaniadto, kabahin niini ang pagpahigayon ug mga “fund-raising activities” aron makatigum ug pondo nga gamiton aron molahutay ang ilahang kapunungan sa mga kabatan-onan.

Sa laing bahin, usa sa upat ka mga pinakaunang PSL sa GKK San Pedro nipaambit usab sa iyang kasinatian. Si Mr. Florencio Aguilar, ang nahibilin na lamang nga buhing PSL niadtong panahona, nisaysay nga dili tiaw ang kaakuhan sa usa ka Pangulo sa Liturhiya. Sa ilang panahon, nagtukmod kanila ang makanunayong pag- giya sa pipila ka mga Canadian Priests nga maoy nagdumala sa Parokya sa San Jose kaniadto pinanguluhan ni Fr. Claude Matt sa PME nga kongregasyon.

Ang usa ka adlaw nga panaw-duaw sa mga PSL sa Archdiocese of Davao nagsilbing ganghaan aron mas mahibaloan sa kadaghanan kung asa nagsukad ang GKK kaniadto. Malipayon ang tanan tungod kay pinaagi niini, nabalikan ug hisgot nga ang GKK San Pedro Tuban nahimong kabahin sa katumanan sa 1963 Constitution of the Sacred Liturgy sa Vatican Council 2 nga ipakaylap gayud ang Maayong Balita ngadto sa katawhang Kristiyano. Sa kasamtangang panahon, ang San Pedro Tuban usa na sa mga lig-ong haligi sa tibuok GKK sa Diocese of Digos. (Julius Paner | Blaze Cantaros)