Mga PSL Gihagit sa Maisugong Pagsangyaw sa Maayong Balita

50TH PSL-KSP ANIBERSARYO: BALAANG PANAW-DUAW

“Andam ba kamo nga magpakamatay alang kang Kristo?”—mao kini hagit ni Fr. Joel Caasi, Direktor sa Archdiocesan Liturgical Commission sa Arkidiyosesis sa Dabaw ngadto sa gatusan ka mga Pangulo sa Liturhiya kinsa mitambong sa balaang panaw-duaw sa GKK San Pedro, Tuban, Sta. Cruz, Davao del Sur niadtong Sabado, Agosto 29, 2015.

Ang balaang panaw-duaw (pilgrimage) maoy usa sa mga mahinungdanong kalihukan isip pagsaulog sa labing unang Kasaulogan sa Pulong (KSP) nga gihimo sa San Pedro GKK 50 ka tuig na ang milabay.

Kapin 600 ka mga PSL nga naggikan sa 37 ka mga parokya sa Arkidiyosesis sa Dabaw ang nagtagbo sayo sa Sabado sa parokya sa Birhen delos Remedios sa Crossing Bayabas, Toril kinsa gipanalanginan ni Fr. Johnny Autida, kura paroko, una milusad sa panaw-duaw.

“Nagpraktis lang ta karon tungod kay ‘life is a journey’ ug ang atong destinasyon mao man ang gingharian sa Dios,” si Fr. Autida nagkanayon.

“Kinahanglan nga masayod kamo kung nganong ang panaw-duaw karon adto man sa GKK San Pedro sa Tuban. Kung dili klaro alang kaninyo ang tumong sa kinabuhi, dili ninyo makita ug masinati ang presensiya sa Ginoo,” siya midugang.

Busa, alang sa usa ka PSL gikan sa Tagakpan nga si Lorenzo Priego, kinsa 4 ka tuig na nga nag-alagad, naghinam-hinam siya nga makaplagan ang matuod nga hinungdan sa maong aktibidad, “Karon pa ko makabisita sa Tuban ug gusto nakong masayran kung nganong adto ang panaw-duaw.”

Madasigon ug mainiton nga gidawat sa mga taga GKK Tuban ang mga delegado kinsa nagmaya sa pagbisita sa mga PSL.

“Dili matukib ang kalipay nga among gibati karon nga nagkita-kita ang mga Layko Ministro sa Liturhiya (LML) sa GKK San Pedro ug mga PSL sa Dabaw,” gipadayag ni Casimiro Magsino, 20 ka tuig na nga LML sa Tuban.

Gisaysay sa labing unang PSL sa Tuban nga si Florencio Aguilar, 90 anyos na karon kung giunsa pagsugod sa mga misyonaryong pari sa PME ang Kasaulogan sa Pulong sa Tuban nga sila si Rev. Fr. Claude Matte ug Fr. Andre Pigeon sanglit hilit ang maong lugar ug dili kini kanunay nga mabisitahan sa kaparian aron sa pagsaulog sa Santos nga Misa. “Dili tiaw ang pagsugod sa KSP pinaagi sa pagdapit sa katawhan nga mosaksi ug maminaw sa Pulong sa Ginoo,” siya nagkanayon, “busa dako ang akong kalipay nga sa pagkakaron milambo ang katilingban sa Tuban.”

Samtang madasigon nga gisaysay usab ni Epifanio Sabandal, unang lider sa kabatan-onan sa Tuban Beach, ang mga kalisdanan ug mga paningkamot nga molambo ug matukod ang kapilya pinaagi sa pagpahigyon ug bayle.

Sama sa giagian sa mga unang nagtukod sa KSP sa GKK Tuban, gidasig ni Fr. Caasi ang tanang mga pilgrims sa pagpadayon sa ilang gimbuhaton luyo ug taliwala sa mga kakulian nga masinati sa pagsangyaw sa Pulong sa Diyos. “Ang atong pagtoo mao ang nakapabarog sa atong komunidad,” siya nagkanayon.

“Dalaygon ang Dios nga gihimo ta sa Ginoo; tungod kay ang Pulong sa Ginoo buhi; nahimo kitang tawo tungod sa iyang Pulong. Sama kang Juan Bautista, ayaw’g kahadlok,” si Fr. Caasi misumpay, “form as a person, a Christian, before we become a leader, a priest.”

Sa iyang homiliya, gihatagan ug pagtagad ni Fr. Caasi ang historical, theological, liturgical, cultural ug emotional nga aspeto sa sa pagpangalagad ingon nga PSL o LML. Siya misumpay nga ang Pulong sa Dios gamhanan ug kini maoy unang tinubdan sa pagtoo ug ang pagka-PSL o LML usa ka higayon sa grasya tungod kay ang matag usa kabahin man sa kasaysayan sa kaluwasan.

Si Anacleto Cal, PSL Coordinator sa Our Lady of the Miraculous Medal sa Indangan mipaambit sa iyang kasinatian isip pinakadugay nga PSL sa pagpangalagad. Gipasalamatan niya ang paghiabot sa Kasaulogan Sa Pulong tungod kay ang Pulong sa Dios nga iyang ginabasa, gianaampo ug ginasangyaw maoy nakapabag-o sa dagan sa iyang kinabuhi.

Kauban ni Fr. Caasi sa kasaulogan sa Santos nga Misa mao sila si Fr. Severino Capulong Jr., Kura Paroko sa St. Francis Xavier, Tibungco ug ni Fr. Hermie Garcia, SSS., Kura Paroko sa Our Lady of the Assumption. (Bong Baldoza | Annie Libres)