Mga mananagat sa Sta. Cruz nakadawat ug ayuda gikan sa BFAR

Mokabat sa 110 ka mga mananagat sa lungsod sa Sta. Cruz, Davao del Sur ang nakadawat ug ayuda nga mga demanong sakayan panagat gikan sa Bureau of Fisheries and Aquatic Resources (BFAR) Regional Office XI, niadtong Agosto 24, 2015.

Kini kabahin sa pagpadayon sa BFAR sa pagtabang sa mga “marginalized” nga mga mananagat sa rehiyon nga nanginabuhi sulod sa Davao Gulf ug aron nga hingpit nang mahunong ang illegal nga pagpanagat sulod sa gulpo.

Ang pagtunol sa mga sakayan gipangunahan ni Carlito Aclao, Provincial Fishery Officer sa Davao del Sur. Matud ni Aclao, ang Sta. Cruz ang dunay pinakadaghan nga nadawat nga sakayan sa tibuok probinsiya tungod kay ang Sta. Cruz ang dunay mas maayong Sistema sa pag implementar sa Fisher Folk Registration.

Sa kabahin ni Atty. Joel Ray Lopez, mayor sa Sta. Cruz, dako ang kaayuhan nga mahatag sa maong ayuda gumikan nga ubay-ubay ang lumulupyo sa Sta. Cruz nga nagsalig sa panagat isip ilang numero unong panginabuhian. Gani, gi awhag sa mayor ang mga mananagat sa pagtuman ug insakto sa balaud sa “closed season” o ang pagbawal una sa pagpanagat sulod sa usa hangtud duha ka bulan sulod sa 15 kilometro nga municipal waters aron dili matugaw ang mga isda sa ilang “breeding season”.

Ang lungsod sa Sta. Cruz adunay 11 ka mga coastal barangays ug may kabaybayonan nga moabot sa kapin kun kulang 30 kilometros ang gitas-on gikan barangay Inawayan hangtud barangay Bato. (Julius Paner | Sta. Cruz)