Mga Catholic Schools ug ang Bokasyon

Gipanalanginan ang atong diyosesis og 16 ka buok Catholic Schools — gikan sa Rogationist Academy sa Baracatan hangtod didto sa Holy Cross of Caburan sa Jose Abad Santos, Davao Occidental. Upat kanila dunay Elementary ug duha lamang ang may College — Cor Jesu College ug Holy Cross College of Bansalan. Ang kadaghanan mga High School.

Sumala sa gipaabot, kining mga tulunghaan sa Simbahan, adunay “specialty” kon “core curriculum” nga walay lain kon dili ang “religious education.” Pinaagi niining “core curriculum”, ang mga estudyante nagpadayon sa pagkaumol sa pagtoong Kristohanon, nga sa pamilya pa lamang nila nasugdan na.

Busa, natural lamang nga gipaabot nga ang mga nagtapus sa maong mga tulunghaan nagakahamtong na sa pagtoo. Sulod sa mga 7 hangtod sa 16 nga panuigon, nagmabungahon ang mga grasya nga nadawat gikan sa mga sakramento nga gisaulog niining mga katuigan — Bunyag, Yukaristiya, Kompirma, Pakig-uli. Nagkaanam og kahamtong ang pagbansay sa pagtoo sa mga nagdumala, mga magtutudlo, mga ginikanan, og mga estudyante sa mga Catholic Schools. Tungod niini, dili lisod paaboton nga gikan niining mga tulunghaan magagikan ang daghan nga mga batan-on nga nakapaminaw ug nagmadawaton sa takagsaong tawag kanila sa Ginoo alang sa pagkapari o sa pagkarelihiyoso.

Ang mga ginikanan sa atong mga estudyante sa Catholic Schools nagkinahanglan usab og pagpalambo ug pagpahamtong sa pagtoo. Kinahanglan kini nila aron sa pagpadayon sa pagtuman sa ilang kaakuhan nga nadawat sa pagbunyag sa ilang mga anak — nga sila ang unang magmatuto sa pagtoo sa ilang mga anak. Pinaagi sa pulong ug buhat, maumol ang ilang mga anak sa paghatag og bili sa mga spiritohanong butang. Nasayud kita nga dili mahimo ang tanan sa mga anaa sa tulunghaan kung wala ang tabang ug suporta sa mga ginikanan. Busa, ang tulunghaan mahinungdanon nga magpahigayon og mga kalihokan alang sa mga ginikanan sa mga estudyante sa tumong nga mapalambo ang ilang pagkamatuohon kang Kristo ug masalmoton sa kinabuhi sa Simbahan.

Niining bulan sa bokasyon, mapuslanon ug mahinungdanon nga ang matag usa ka mga Catholic Schools maghimog directoryo sa mga alumni nila nga nagpari o nagrkihiyoso, ug sa mga anaa pa sa pormasyon sa seminaryo o nobisyado. Nindot kon imantala sa mga magtotoo sa parokya ang maong directoryo inubanan sa ilang mga larawan.

Interesado kaayo ako mahibalo sa resulta sa maong directoryo. Unsa kahay ipadayag niini kanato. Natinuod ba kaha ang gipaabot natong daghang bokasyon gikan sa Catholic Schools?