Mga Buhat sa Dios – Pagtoo og Kinabuhi sa Tawo

Isaiah 35:4-7; Salmo 146:7, 8-9, 9-10; James/Santiago 2:1-5; Mark 7:31-37

Niining ika-23 nga Domingo sa Ordinaryong Panahon, ang mga pagbasa nagdala kanato sa pagpamalandong sa mga buhat sa Dios nga nagtawag sa tawo sa pagpuyo sa Kristohanong kinabuhi.

Una, ang saad sa Dios sa mahimayaong umaabot nagdasig sa tawo sa pagpabilin sa pagbarog og pagpadayon pagsubay sa dalan sa kinabuhing pagkabalaan taliwala sa kadautan, kasal-anan, og kapit-os.

Sa kasaysayan sa tawo anaa ang mga kalisod, kapildihan, kasakitan bunga sa buhat sa tawo hinungdan sa sala. Apan matud ni propeta Isaiah anaa ang maayong balita, kini mao ang paghari sa Dios diin anaa ang walay katapusang pagmaya: ang mga buta makakita, mga bungol makadungog, ang mga tubig modagayday ug uban pa.Nga imbis mabugnaw, hinonoa mas magmadasigon pa sa pagtoo sa Dios sa panahon sa mga pagsulay. Kini usa ka dakong paglaum sa tawo.

Ikaduha, ang kalooy ni Hesus sa hangyo sa mga masakiton nagtukmod kaniya sa pag-ayo kanila.Nga bisan itapion nalang iyang mga kamot kanila, mamaayo sila. Sa pag-ayo sa bungol mi-akto si Hesus paghangad sa langit, nanghupaw, ug miingon sa tawo “Efata!” (“maabli ka!”).

Kini nahitabo diha sa iyang pagpangalad sa katawhan. Si Hesus nagdapit kanato sa pagduol kaniya, pagpangayo sa iyang panabang og kalooy. Ug sa pagpangalad sa katawhan, sama kang Hesus mohangad kita sa langit.

Ikatulo,kita nga mga sumusunod ni Kristo atong magtutudlo sa kinabuhi og atong Dios kinsa nagluwas kanato pinaagi sa iyang pagdaug sa kamatayon,ang sulat ni Santiago nag-agni kanato sa pagtubag kang Hesus pinaagi sa pagpuyo sa kinabuhi sa katarong, kaangayan, pagkamapaubsanon, og pagkakabus diha sa Ginoo.

Ang pagtulon-an ni Hesus, ang mga espirituhanong birtud, ang pagkamahigugmaon og maloloy-on mao ang mga giya sa kristohanong pagkabalaan.

Ang bulan sa Setyembre bulan sa bokasyon. Ang bokasyon mao ang tawag sa Ginoo kanato una sa tanan sa pagpuyo sa kristohanong pagkabalaan. Nga bisan unsa pa man ang atong gipili nga bokasyon sa kinabuhi, magdala unta kini kanato ngadto sa pagkabalaan og pagpangalagad. (Fr. Pepe Retorca D.C.D.)