Malungtarong kaminyuon plano nga Diosnon

Ika-27 nga Domingo sa Ordinaryong Panahon
Gen. 2:18-24/Ps. 128/Heb. 2:9-11/Mk. 10:2-16

Usa sa walay hunong nga hisgotan sa katilingban, debate sa tulunghaan, diha sa senado og kongreso, mao ang KAMINYOON OG DIBORSIYO. Sa atong ebanghelyo karong adlawa si Jesus mihatag og klaro nga pagtulun an mahitungod niini. Ang mga Pariseo misulay pagbitik kaniya dihang gipangutana nila si Jesus kon gitugot ba ang diborsiyo kay si Moses gitugutan man.

Si Jesus mitubag nga kadto gitugutan, tungod sa kagahi sa ulo sa mga tao. Unya gipahinumdum ni Jesus sa mga Pariseo ang pagmugna og babaye og lalake sa sinugdan, aron tudluan sila mahitungod sa plano sa Dios alang sa kaminyoon. Mao kana ang gihisgotan sa unang pagbasa (Gen.2:18-24). Niining modernong panahon, daghan sa mga tawo buot usabon o tuison ang orihinal nga plano sa Ginoo mahitungod sa kaminyoon og pamilya. Ang kaminyoon dili lang mahitungod sa babaye og lalake. Gusto nila iapil ang “same-sex union.”

Ang bata nahimong babag alang sa magtiayon sa pagkab-ot sa ilang mga tinguha sa kinubuhi. Wala na nila kini gitan-aw nga natural og nindot nga gasa sa kinabuhi bunga sa panaghiusa sa magtiayon. Ang uban wala na makita ang kabililhon sa kaminyoon, ang uban usab nag puyo puyo daw sama sa minyo bisan walay “commitment” nga gipanag-ambitan sa usag-usa atubangan sa Ginoo.

Ang atong mga pagbasa klaro nga pahinumdum nga kining tanan nga ato gitawag nga “modernong panghuna-huna” sukwahi sa plano sa Ginoo alang sa katawhan. Ang Dios gimbut-an nga ang kaminyoon usa ka malungtaron nga kasabotan tali sa usa ka babaye og usa ka lalake, nga abli sa gasa sa bag-ong kinabuhi (anak).

Klaro ang mga gipahayag ni Jesus, miingon siya sa mga naminaw nga ang kaminyoon usa ka permanente nga pagtugyan sa kinabuhi, og ang diborsiyo dili kabahin sa plano sa Dios. Tinuod kon dunay mga pag abuso nga mahitabo kinahanglan bulagon ang magtiayon. Apan kon tinuod (valid) ang kaminyoon nga nahitabo, ang bana o asawa dili gawasnon sa pagminyo pag usab. Ang pagtulun-an sa simbahan mahitungod ani nga mga isyu sa pamilya og kaminyoon, pinasikad gayud sa pagtulun an ni Kristo. Daghan kanato naglisod sa pagdawat niini nga pagtulun an. Kay mao lagi usa ka dakong hagit ang pagpuyo nga putli taliwala sa nagkadaiyang tentasyon sa usa ka katilingban nga nagkaguliyang ang moral nga baroganan.

Atong hinumduman ang pahimangno ni San Pablo sa ikaduhang pagbasa nga si Jesus miunong kanato; nahimo siya nga tawo aron iyang masinati atong kondisyon, og iya usab masinati atong mga pag-antos sa kinabuhi.

Iya gipas-an ang tanan natong kasinatian sa pagpakasakit og nagpakamatay aron kita maluwas og kita matagaan og kusog sa atong pag atubang sa nagkadaiyang pagsulay sa kinabuhi.

Maong diha lamang sa iyang grasya nga atong mapuy an nga dunay baruganan ang tinuod nga plano sa Dios mahitungod sa kaminyoon og pamilya. Mga igsoon, diha sa atong pakighiusa kang Hesus, siya dili gayud “makigbulag” kanato, bisan pa sa daghang higayon kita nagmaluibon sa atong relasyon Kaniya. Labi na sa daghang higayon nga kita modumili sa paghigugma og sakripisyo aron lang pagpatagbaw sa atong kaugalingong tinguha. Ang tinubdan sa sala og dibisyon naa sa atong kasing-kasing og ang way puas nga bugno tali sa atong lawasnong kailibgon og atong espiritu.

Atong kahuyang nagdala kanato sa nagkadaiyang hiwi nga direksyon sa kinabuhi. Mao usahay makaingon kita, labi na sa daghang mga batan-on karon nga ang tinuod nga gugma o ang “forever” imposible. Atong ibutang atong kasing-kasing diha sa malumo nga kasing-kasing ni Hesus og tugutan nato siya nga mogiya kanato aron puno sa pagsalig atong mapuy an ang iyang plano og kabubut on diha sa atong kinabuhi. Amen. (Rev. Fr. Rolando Mandreza)