‘iHerald’ Mobile App Ilusad; DACS Tie up sa 2016 Piniliay

Aron hingpit nga mapakatag ang impormasyon pinaagi sa modernong komunikasyon kabahin sa kalihukan sa simbahan, gitakdang ilusad sa Archdiocesan Commission on Social Communications (ACSC) ang mobile application (app) nga gitawag ug ‘iHerald’ atol sa paglusad usab sa “E=CHAMP” kon ang kampanya alang sa katuhoan (CREDIBLE), matinud-anon (HONEST), ensakto (ACCURATE), mahinungdanon (MEANINGFUL), ug malinawon (PEACEFUL) nga piniliay.

Ang E=CHAMP, usa ka proyekto sa Davao Association of Catholic Schools (DACS-CEAP XII) nga unang gilusad niadtong milabay nga eleksyon sa tuig 2013, gitakdang himoon na usab alang sa 2016 nga Presidential Elections.

Pinaagi sa hiniusang pwersa sa social communication ug sa mga volunteers nga mga estudyante, gilaumang makab-ot ang mga tinguha alang sa piniliay sa sunod tuig.

Ang ‘iHerald’ maoy usa sa mga instrumento sa modernong komunikasyon gamit ang mga cellphones diin dali ra nga mamantala sa social media ang mga panghitabo atol sa eleksiyon. Bansayon ang mga moboluntaryo sa E=CHAMP alang sa epektibong paggamit sa mobile app inabagan sa usa ka eksperto gikan sa EWTN, usa ka international nga Catholic Media Network.

Ilusad ang ‘iHerald’ ubos sa social media arm sa Davao Catholic Herald, ang mantalaan sa Diyosesis sa Davao, Digos, Tagum ug Mati (DADITAMA).

Suportahan usab sa umaabot nga DXGN 89.9 SPIRIT FM ang pagsibya sa kahimtang sa piniliay ug voters education.

Ang tie-up tali sa ACSC ug DACS maoy usa sa mga tubag sa panginahanglan sa sistema sa komunikasyon nga nakit-an atol sa assessment sa milabay nga pagpahigayon sa E=CHAMP niadtong tuig 2013.

Gitakda ang formal lauching sa E=CHAMP sa Martin Hall sa Ateneo de Davao University sa Nobembre 14,2015 kauban sa kapin kon kulang 4,000 ka mga volunteers nga mga estudyante gikan sa nagkalain laing tulunghaan sa Davao, Digos, Tagum ug Mati.

Usa ka pinalahi nga training ug soft launching ang paghimoon karong Septembre 26,2105 sa mga sakop sa Parish Social Communications ug uban pang mga editorial staff kinsa gipailalom na sa mga Media Baby ka Ba? Seminar. (Annie Libres)