Bible Speech Choir nag dry run

Bible Speech Choir Nag dry run
Gipahigayon sa miaging mga semana ang mga pagbansay kon praktis – “dry run” sa managlahing mga sona sa parokya sa San Nicolas de Tolentino Cathedral sa ilaha unyang ipasundayag nga choral recitation kon Speech Choir Contest sa piniling mga pagbasa gikan sa balaang Bibliya.

Nagsugod ang mga pagbansay sa bulan sa Agosto isip training alang sa pinal nga presentasyon karong Nobyembre, ang naandang bulan sa mga kalihokan sa Bibliya sama sa Bible Quiz nga karon motanyag og laing klase nga group activity – ang Bible speech choir.

Sumala ni Bible Apostolate (BA) diocesan coordinator Sr. Belen Suimit, LGC, kasamtangang nangandam usab ang ubang mga parokya sa diyosesis alang sa ikatakda unya nga diocesan level competition. Sa samang bahin, ang Cathedral parish mopahigayon sa ilahang championship day sa Bible Speech Choir sa ilang parish day sa Nobyembre 28-29, kon diin mosangka ang upat ka mananaog nga pundok nga mo-represintar sa upat nga mga sona sa parokya.

Masayran ra unya ang adlaw sa pagsangka sa mga winner sa diocesan level.

‘Take One On the Air’
Kini ang bag-ong tulumanon sa live singing contest matag udto sa DXHM-AM/DXDV-Spirit FM sa siyudad sa Mati agi’g pagpangandam alang sa Grand Finals atol sa ika-25 ka tuig kon silver jubilee sa sibyahanan sa Heart of Mary Station (DXHM) sa Marso 19, 2016. Sugod niadtong Hulyo ning tuiga, nagasalmot ang si kinsa mang buot mokanta pinaagi sa pag-adto sa sibyahanan o kung dili man, sa telepono—landline o mobile phone.

Ang technician sa radyo mao nay motugtog sa minus one accompaniment sa unsa mang gipili nga kanta, ug ang hurado mohusga pinaagi sa pagpaminaw sa radio. Malipayon ug mapasalamaton ang emcee, si Finance Officer Edith Enciso, samtang ang tibuok pwersa sa radyo ang masadyaon usab sa pagsalmot sa mga tawo dili lang gikan sa siyudad sa Mati ug sa mga lungsod sa Davao Oriental, kondili usab gikan sa Davao del Sur-del Norte-Occidental, ug sa Agusan ug Surigao. Ang istasyon nagasalig usab sa atong Mahal nga Birhen Maria alang sa kalampusan sa ginalantaw nga ika-25 nga anibersaryo sa radyo sa kapistahan usab sa bana ni Sta. Maria, si San Jose. Sa maong adlaw usab sa 2016 saulogon sa DXDV-Spirit FM ang ika-7 nga kasumaran niini. Ang tanan sa ikahimaya sa Diyos pinaagi ni Hesus ug ni Birhen Maria.

K to 12 program suportado sa mga magbabalaod sa probinsya
Suportado sa 14th Sangguniang Panlalawigan (SP) ang pagpatuman sa K to 12 nga programa sa gobyerno. Gani, gi-aprobahan sa 14th SP ang usa ka ordinansa gikan sa Sangguniang Panlalawigan sa Misamis Oriental nga naglatid gihapon sa maong katuyuan. Dili pa lamang dugay, ang City Schools Division Office sa Mati ang nagpatawag og usa ka media forum on K to 12 nga gitambongan usab sa DXHM-AM/ DXDV-FM sa tumong nga hingpit pa nga mapasabot ang maong programa, ug mapadangat ang katuyuan ni-ini ngadto pa sa mas bagang hut-ong sa katawhan.

Sa forum, nabatbat ang mga katuyuan sa programa, ug nag-una na ni-ini mao ang pagtubag sa hagit sa globalisasyon karon sa edukasyon. Nasayran nga sa mga nasud sa Asya, ang Pilipinas pa lang ang nagpabilin sa daan nga sistema sa edukasyon.

Gipahayag pa ni Schools Division Supt. Reynaldo Guillena nga ang K to 12 mao unya ang motubag sa mga kakuwangan sa nasud sa pagtunol sa serbisyo sa edukasyon. Ang mga magtutudlo gikan sa mga tulunghaang publiko ug pribado, lakip ang mga Catholic schools napailawom na usab sa mga training, labi na ang pagpangandam alang sa pagbukas sa Senior High kon Grades 11-12 sa sunod tuig. (Sr. Marietta Alo, OND & Neela Duallo)