‘Barog sa Kamatuoran’

SAMA kang Birhen Maria gihagit kita sa pagbarog sa kamatuoran. Atol sa pagsaulog sa kapistahan sa Birhen Dolorosa sa Babak niadtong Setyembre 15 gihagit ni Arsobispo Romulo Valles ang matag usa sa pagbarog sa kamatuoran sama sa pagbarog ni Maria sa tiilan sa krus. Sumala pa ni Abp. Valles, daghang mga hagit ug pagsulay karon nga nihagwa sa atong katilingban ug sa pagtoong Katoliko.

Isip mga sumusunod ni Kristo atong obligasyon ang pagsuta ug pagbarog kung unsa ang tama mapopular man kini o dili. Kay sumala pa niya dili tanan nga gihanyag sa kalibutan karon nahisubay sa tama. Busa kita nga nasayod subay sa pagtulun-an ni Kristo kinahanglan mobarog aron matul-id kung unsa ang dili tarong ilabi na sa mga bala-od nga wala nahisubay sa pagtulun-an ni Kristo.

“Ang pagbarog ni Maria sa tiilan sa krus ni Kristo usa kahulagway nga makapabuhi sa atong pagtoo,” dugang pa ni Yanong Muloy.

Tulo ka punto ang gihatagan ug pagpalawom sa iyang homiliya sa hulagway sa pagbarog ni Maria sa tiilan sa krus, una mao ang pagkaanaa, ang pagbarog. Si Maria naa kanunay andam sa pagbarog sa iyang anak ug alang kanato sa kalipay man o kasakit. Si Maria andam nibarog ilabi na sa panahon nga siya nalang mismo ang nag-inusara para sa iyang Anak. Gihagit ni Valles ang magtotoo sa pagbarog sa kamatuoran ilabina karon nga daghan kaayong hagit sa pagtoong Katoliko ug Kristiyano. Ikaduha, ang pagkamasinugtanon, sumala pa kinahanglan kitang mahimong sensitibo kung unsa ang tingog sa Diyos alang kanato. Sama kang Maria nga kinatibuk-ang gihatag ug gisunod ang tingog sa Diyos alang kaniya. Ikatulo, pagkainahan. Si Maria nagpakamatinud-anon kanunay sa iyang kaugalingon ug kani maoy nahimong giya sa iyang kinabuhi. Si Maria mao ang atong tulay kang Kristo. Dili lang nato s’ya higala kung dili inahan natong tanan. (Rommel R. Jandayan, VDP SocCom)