Ang Eyukaristiya ug ang Gagmay’ng Kristohanong Katilingban

Ginaingon nga “Ang Simbahan naghimo sa Eyukaristiya ug ang Eyukaristiya naghimo sa Simbahan.” Ingon niini kasuod sa relasyon tali sa duha; ingon niini ang suod sa kalambigitan tali sa kasaulogan sa Santos nga Misa ug sa atong Gagmay’ng Kristohanong Katilingban.

Ang GKK giisip nga bag- ong pamaagi sa pagkinabuhi isip Simbahan. Isip Gagmay’ng pundok sa mga Kristiyanos, kini konkretong kasinatian sa pagka simbahan isip panaglambigitay. Usa kini ka katilingban kansang mga sakop nakaamgo sa ilang pagka- anak sa Dios ug sa ilang pagka managsoon sa usag usa diha kang Kristo. Ang mga sakop sa GKK nagkahiusa sa pagsalmot sa mga kasaulugan sa pagtoo nga adunay kalambigitan sa konkretong kinabuhi: sa nagkadaiyang debosyon, sa Kasaulugan sa Pulong o Hiniusang Pag-ampo, apan labaw sa tanan ang Santos nga Misa nga mao ang pinakataas o lintunganay sa tangang mga pag-ampo ug tinubdan o kalig-on sa Kristohanong Katilingban.

Ang pagsimba kabahin gayud sa kinabuhi sa katawhan sa Dios sumala sa Balaang Kasulatan. Sa usa ka bahin, sukad pa sa Daang Tugon, mabasa nato ang nagkalaing laing teksto nga nagpahayag sa pagkahimbahon ug pakamaampoon sa Israel. Gani sa napulo ka sugo nga gihatag sa Dios sa iyang katawhan pinaagi ni Moises, gihatagan og gibug-aton ang pagsimba sa Dios ilabi na sa Adlaw’ng Igpapahulay: “Hinumdumi ang Adlaw’ng Igpapahulay ug balaana kini” (Ex 20:8). Busa gibalaan gayud kini sa Hudiyo pinaagi sa pag-adto sa sinagoga aron pagsimba sa Dios ug sa pagpamati sa sa Balaod ug sa pagtulun-an sa mga Proeta. Gawas sa matag semanang pag simba, kada tuig moadto sila sa templo aron sa pagsaulog sa Pangilin sa Pgpasaylo nga usa sa labing dakung pista alang kanila kay kini mao man ang adlaw sa paghandom sa makaluwasnong buhat sa Dios alang kanila sa dihang sila gipalingkawas gikan sa pagka-ulipnon didto sa Ehipto. Kini usab gisaulog sa matag pamilyang Hudiyo diha sa panimalay atol sa Panihapon sa Pagsaylo.

Sa laing bahin, ang bag-ong Tugon naglarawan usab sa pagkamaampoon mismo ni Jesus ug sa iyang pagtulun-an mahitungod sa pag-ampo. Gihisgutan sa Bibliya ang pagsalmot ni Jesus ug sa mga tinun-an sa mga kasaulugan sa sinagoga ug ang pag adto nila sa templo. Gani gisaulog sa Ginoo ang Panihapon sa Pagsaylo sa mga Hudiyo uban sa iyang mga tinun-an. Niining higayona ang pan ug bino nga ilang gipanag-ambitan isip pagsaulog sa kalingkawasan gikan sa kaulipnan sa mga kabos ug nag antos nga mag Israelita didto sa Ehipto, nahimong iyang lawas ug dugo nga gihatag alang sa kaluwasan sa tanan. Sa maong panihapon gisugo usab sa Ginoo ang mga tinun-an sa pag-alagad sa kaigsoonan. Ang tinuod nga pag-ampo sa katilingban ngadto sa Dios naglangkob usab sa pag-alagad sa katawhan diha sa ilang panginahanglan.

Human sa pagkabanhaw sa Ginoo, padayon ang mga tinun-an sa ilang pagsimba, apan lahi na sa pamaagi sa mga Hudiyo. Ang ilang pagsimba gisentro nila kang Jesus ug ginahimo sa iyang ngalan (cf Buhat 2:38), sa pagpamati sa pagtulun-an sa mga Apostoles ug sa pagpikas-pikas sa pan, sumala sa gisugokanila sa Ginoo atol sa Katapusang Panihapon, uban sa masadya ug mapaubsanong kasingkasing (Buhat 2:42, 46).

Ang maong pag ambit nila sa lawas ug dugo sa Ginoo, wala lamang magdasig kanila sa pagpaambit sa ilang kaugalingon kondili nagpalig-on sa ilang pagka-katilingban sa mga tinuy-an. Padayon silang gimugna sa Eukaristiya isip Simbahan tungod kay sa padayon nilang pagpahigayon sa maong Kasaulugan, mas labi pa silang nalig-on sa pagbuhat sa ilang misyon.

Busa sama nga kon hain adunay Eyukaristiya aduna usab katilingban sa mga tinun-an, maka ingon kita nga kon naay simbahan — sukad pa sa sinugdan — adunay “pagpikas-pikas sa pan”. Ang Eyukaristiya ang nagmugna sa Simbahan ug ang Simbahan nagmugna sa Eyukaristiya. Kinin ang misteryo nga padayon nga nasinati karon diha sa Kristohanong katilingban sa paaging sama gihapon kaniadto. Padayon nga gilig-on ang atong simbahan, ang matag parokya, ang tanan binunyagan diha sa pagsaulog sa Santos nga Misa; padayon usab ang pagsaulog Eyukaristiya diha sa Simbahan alang sa paglig-on sa Kristohanong Katilingban.

Ang hingpit ug kompleto nga paagi sa pagsaulog sa Adlaw sa Ginoo mao ang pagsalmot sa Santos nga Misa. Apan dli kini mahimo diha sa mga GKK kay walay igong mga pari nga mangulo sa Kasaulugan. Busa ang atong Simbahan nagpahigayon ug uybang pamaagi aron dili kahikawan ang, mga binunyagan sa gikinahanglan nilang kalig-on gikan sa Pulong sa Dios ug sa Lawas ug Dugo ni Kristo. Nasugdan ug gipadayon and Kasaulugan sa Pulong. Gani, dugay dugay na usab nga adunay pagpakalawat gawas sa Misa sa mga kapilya, Gitugutan kini aron ang mga magtotoo mahiusa dili lamang sa Ginoo tungod sa pagdawat sa iyang Lawas ug Dugo, apan usab aron mahiusa kita sa usa’g usa isip Simbahan. Apan dili kalimtan nga kining kahiusahan naglakip sa atong kahiusahan sa mga kaigsoonan diha sa ilang tagsa tagsa ka kahimtan ilabi na sa kalisdanan sa katawhan ug sa tibuo sa kalibutan, kay ang lawas ug Dugo sa Ginoo gihatag ug giula man alang sa tanan. Ang Eyukaristiya Sakramento sa Kahiusahan sa Dios ug sa tawo sa tanang kabuhatan. Ingon niini kabililhon ang Eyukaristiya alang sa Simbahan.

Karong umaabot nga Enero 24-31, 2016, ipahitabo dinhi sa atong nasud didto sa syudad sa Cebu, ang ika 51 nga Internasyonal Eyukaristiko nga Kongreso. Magkatigom ang mga representante sa mga magtotoo gikan sa nagka lainlaing nasud alirong sa Eyukaristiya, sa pagsaulog niini, sa pag simba, ug sa pag ampo atubangan sa Ginoo. Mamahimo unta kining panahon sa grasya alang kanato aron mas masabtan ang kahulugan, mas mahatagn ug bili ug mas mapuy-an nato ang misteryo sa Lawas ug Dugo sa Ginoo. Mas mahimo unta ang atong mga Katilingban Kristohanon nga lig-on diha sa ilang misyon. Sama nga ang Ginoo sa Eyukaristiya mipaambit sa iyang Kaugalingon, ang atong Eyukaristikanhong Katilingban mamahimo untang mapainambiton sa mga kaigsoonan ug sa tanan nga nanginahanglan. Tumong man gud sa Kongreso nga atong matutukan ang sosyal nga bahin o katilingbanong aspeto sa santos nga misa.

Dili kalimtan ang kalambigitan sa Eyukaristiya ug sa atong katilingban, Kita isip Katilingaban ang nagsaulog sa Eyukaristiya; apan anaa ta tungod usab sa Santo nga misa nga naghimo kanatong lig-on ug kusgan sa simbahan!

Pangutana alang pagtuon ug pamalandong atol sa pag inambitay:

• Unsa kasuod ang Eyukaristiya ug ang simbahan? Unsa ang GKK? Giunsa pagsimba sa mga Hudiyo? Giunsa pagsimba sa mga Kristiyano? Unsay giingon ni Kristo atol sa katapusang panihapon nga maoy gituuhan sa Simbahan? Unsa ang hingpit ug kumpleto nga paagi sa pagsaulog sa Adlaw sa ginoo? Nganong adunay Kasaulugan sa Pulong ug pagpakalawat sa Kapilya? Unsay atong gitinguha nga mabatuna isip bunga sa IEC? Unsa ka importante alang kanato ang Eyukaristiya?

Sugyot nga Kalihukan:

• Niining semanaha, paningkamutan nag pghalad ug dugang panaho sa pag ampo, kon mahimo, atubanagn sa Balaang sakramento sa Kapilya o sa Parokya, dili lamang alang sa kaugalingon kondili sa uban kansang kalisdanan atong nahibaloan.

Estoryahon ug dasigon ang mga sakop sa pamilya sa pagsimba ug pakig-uban sa pag-ampo sa katilingban.