Ang Adlaw’ng Natawhan ni Maria

SUKAD pa sa unang siglo, ang debosyon sa Mahal nga Birheng Maria mao ang pinaka-una nga elemento sa espiritohanong kinabuhi sa kadaghanang Kristiyanos, ilabi na sa pagtoong Katoliko.

Gikan sa Konsilyo sa Ephesus niadtong tuig 431 A.D. hangtud sa Ikaduhang konsilyo sa Vaticano ug sa encyclical nga sulat ni Papa Juan Pablo II nga giulohan ug Redemptoris Mater, si Birheng Maria nakita ug giila dili lang Inahan sa Dios, kondili giila usab siya nga Inahan sa Simbahan.

Siya ang tigpataliwala sa katawhan ngadto sa iyang Anak nga si Ginoong Hesukristo o Mediatrix, ug gituhoan usab nga nakatabang sa pagbuhat sa pagpangluwas o Co-Redemptrix.

Siya natawo sa Nazareth,Galeliya ug ang iyang ginikanan mao si San Joaquin ug Santa Ana. Sumala sa tradisyon siya natawo sa bulan sa Septembre 8, ang kapistahan sa pagsaulog sa natawhan ni Birheng Maria orihinal nga nagsugod sa Jerusalem sa una pang kapanahonan ug gipauswag kini sa tibook Simbahan ni Papa Sergius I sa tuig 687 A.D., ug gitohoan nga gianak ni Birheng Maria si Ginoong Jesukristo sa 16 anyos ang iyang panuigon.

Si Birheng Maria tungod sa iyang talagsaong gasa ug pagka-Inahan ni Kristo, Dios-Tawo ug manluluwas, adunay talagsaon uyamot nga lugar sa Simbahan ug kanatong tanan. Si Maria Adunay lalom nga panag-uban ni Ginoong Jesukristo sa pagbuntog sa sala ug ni Satanas (Genesis 3:15). Siya nahimong kabulig ni Kristo sa pagluwas sa kalibutan (Galacia 4:4, Lucas 2:34-35).

Tungod sa paglitok ni Maria ug “fiat” (Yes, Lord), pinaagi sa mensahe sa Anghel nga ang Pulong mahimong Unod ug iyang pagasabakon, nahimo siya dili lang Inahan sa Dios tungod lang sa tawhanong han-ay sa kinaiyahan, kondili tungod usab sa espirituhanong han-ay uban sa grasya sa Dios, nahimo siyang inahan sa tanan (Lucas 1:26-38, Juan 1:1,14).

Busa ang Simbahan ni Kristo dinhi sa kalibutan lig-on nga nagtudlo kanato nga mohatag kita ug taas nga debosyon, pagtahud, ug pagdayeg kang Birheng Maria tungod “diha sa mensahe sa anghel nadawat niya ang pulong sa Dios nganha sa iyang kasingkasing, lawas ug naghatag ug kinabuhi sa kalibutan. Gipasidunggan siya ug gitahod isip tinuod gayud nga Inahan sa Dios ug Inahan sa manluluwas. Tungod usab niini nga mga pag-asoy siya usab nahimong pinalanggang anak sa Amahan ug Templo sa Espiritu Santo; siya milabaw sa tanang mga binuhat, sa langit ug sa yuta. Ang Simbahang Katoliko nagtudlo pinaagi sa Espiritu Santo, mipasidungog kaniya sa labing halawom ug dungganon nga pagka-Balaan isip labing mahigugmaong Inahan” (Constitution on the Church, C-VIII “The Blessed Virgin Mary Mother of God, in the Mystery of Christ in the Church”a:53).

Isip mga Kristiyanos nga nag-ila kang Kristo, angay gayud nga atong hatagan ug bili si Birheng Maria nganhi sa atong kinabuhi, maingon nga Inahan siya ni Kristo nga maoy nagluwas kanato siya usab atong Inahan (Buhat 1:14), ang debosyon ug pag-ampo nato kang Birheng Maria dili kini usa lang ka-imbento, o nitungha lang ba hinoon o gitudlo lamang kini sa atong mga kapari-an, kondili nag-gikan kini sa sugod gayud sa pagpili kaniya ug nganha kaniya ipakatawo ang Anak sa Dios.

Si Birheng Maria nag-ingon ug nagmando kanato nga ang tanang kaliwatan motawag kaniya ug bulahan (Lucas 1:48), tungod kini sa iyang talagsaong pribilihiyo nga maoy napili nga Inahan sa Dios (Lucas 1:43).

Ang pag-ampo nato kang Birheng Maria dili sabton nga giampoan nato siya ingon nga Dios o diosa ba hinoon sama sa ginatudlo ug gipasangil sa mga tawo nga dili modawat kaniya, kondili nag-ampo ta kaniya isip usa ka Inahan nga makatabang kanato, nasayod kita nga siya duol kang Kristo ug sa Amahan, sanglit siya Inahan ni Kristo (Mateo 1:23).

Pinili sa Amahan (Gen. 3:15, Lucas 1:30), ug Esposa sa Espiritu Santo (Lucas 1:35), ug tungod niini ang iyang mga pag-ampo dungganon gayud, busa dili dautan kong mosangpit kita kaniya, sanglit si Ginoong Jesukristo mismo maoy nagapadayag nga siya atong Inahan ug atong pagadawaton. Diha kini nahitabo samtang nagbitay pa siya sa Krus ug nakita niya si San Juan nga iyang tinun-an sa iyang tiilan uban ang iyang Inahan nga si Birheng Maria siya miingon “Babaye ania ang imong Anak, ug unya miingon siya sa iyang tinun-an, Ania ang imong Inahan” (Juan 19-26-27).

Sayod usab kita mga kong si Birheng Maria maoy mohangyo kang Kristo, dili gayud siya kabalibad sa iyang Inahan. Gipakita mismo ni Kristo sa dihang miduaw sila ug nakigduyog sa kombira didto sa kasal sa Cana, ug nianang higayona nahutdan ug bino. Diha-diha ang Inahan ni Kristo si Birheng Maria miduol kaniya ug mihangyo nga nahutdan na sila ug bino, bisan ug dili pa unta panahon kadto ni Kristo nga mogamit sa iyang gahum wala niya kini mapugngi ug nakabuhat siya ug dakong milagro diin ang 30 ka galon nga tubig iyang gihimong bino. Ang bino nga gihimo ni Kristo mao ang labing maayo nga bino. Mao kadto ang pinaka-una nga milagro nga iyang nabuhat. Bisan pa ug dili pa panahon nga iya kadtong buhaton, apan tungod sa hangyo sa iyang Inahan wala siya kabalibad (Juan 2:1-13), busa tataw kayo ang kasulatan nagpadayag nga ang mga pag-ampo ni Birheng Maria makatabang gayud ug dako, sanglit ang paghatag ug pagtahud kang Birheng Maria nagsugod kini kang Anghel Gabriel ang mensahero sa Ginoo, siya midayeg ug mitahud kang Maria sa pag-ingon “Maghimaya ka, Puno ka sa Grasya” (Lucas 1:28), ug misunod usab sa pagdayeg ug pagtahud kaniya si Santa Elizabeth sa pag-ingon “Bulahan ka sa babayeng tanan, ug Bulahan usab ang bunga sa tiyan mo nga si Jesus” (Lucas 1:39-45), busa alang natong mga Kristohanon atong kaakohan gayud nga atong hatagan ug dakong pagtahud ug pagdayeg ang Inahan sa atong Ginoo nga si Birheng Maria, sama sa gihatag nga pagtahud sa Anghel ug mga unang Kristohanon, ang pagtahud ug pagpasidungog sa usa ka Inahan, makapahimoot kanatong mga Anak, apan ang pagtamay sa Inahan makapatamay usab sa Anak, busa kong kita midawat kang Kristo nga atong Ginoo ug manluluwas apan atong gisalkway ang iyang Inahan, sama ra kita sa usa ka iro human gisabak ug giamoma sa Inahan inig dako gisalikway dayon.

Apan kita tawo adunay kalag adunay kaalam dili kita usa ka iro o mananap nga human sa tanan mosalikway sa Inahan, kondili ang atong Inahan atong panggaon ug amomahon sama sa ilang pag-amoma kanato samtang bata pa kita, sama ni Ginoong Jesukristo bisan pa nga nagbitay na siya sa Krus nagbingit na sa kamatayon nakahimo pa sa pagbilin sa iyang Inahan ngadto sa iyang mga tinun-an (Juan 19-26-27), ingon-ana ang pagmahal ni Kristo sa iyang Inahan.

Busa kong ikaw nagtoo, nidawat ug misimba kang Kristo apan gisalikway mo ang iyang Inahan nga si Birheng Maria, kawang lamang ang imong pagtoo, pagdawat ug pagsimba kang Kristo. “Abandoning the Mother is but one step, from Abandoning the Son.”