Pasiuna Ug Pahimangno (Diocesan IEC Booklet)

Sa usa ka bahin, karong Enero 24-31, 2016, ipahitabo dinhi sa atong nasud, sa ikaduhang higayon, ang usa ka internasyonal nga Eukaristikong Congreso (IEC). Niadtong 1937, napahitabo na dinhi sa Pilipinas, sa Manila ang ika-33 nga Internasyonal Eyukaristikong Kongreso.

Sa sunod tuig, ang ika-51 nga Kongreso ipahitabo didto sa Cebu. Usa kini ka panagtigum nga relihiyoso diin ang mga magtotoo sa tibuok kalibutan gidapit alang sa pagsaulog sa Eyukaristiya. (Kini ang sentro sa Kasaulugan), sa pagsimba niini, ug sa pag-ampo atubangan niining presensya sa Ginoo. Tumong niining maong panagtigum ang mas lawom nga pagsabot ug mas hugot nga pagtugyan sa kaugalingon ngadto sa Eyukaristikanhong misteryo, pinaagi sa katekesis, kasaulogan sa Pulong sa Dios, pag-ampo ug panagtigum. Ang Tema sa Kongreso mao kini, “Si Kristo diha kaninyo, atong paglaum sa himaya”.

Sa laing bahin, atong gisaulog — isip kabahin sa atong pagpangandam alang sa ika-500 nga tuig sa Kristiyanismo ug pagka Katoliko sa atung nasud — ang Tuig sa mga Kabus. Ang mga kabus dili lamang kadtong adunay kakulang sa mga materyal nga mga butang kondili usab sa mga kasinatiang espirituhanon, lakip na ang kakulangan sa uban pang aspeto sa kinabuhi: moral, sosyal, kultural, ubp.

Busa ang hiniusang tema sa atong pamalandong mao kini. “Si Kristo diha kanato, paglaum sa himaya alang sa kabos”. Unsa kini: hitting two birds with one stone?

Dili sulagma nga adunay kalambigitan kining duha ka nahisgutang kasaulogan tungod kay ang paglantaw sa Kongreso, mao ang Eyuristikanhong pagsabot sa simbahan nga naglangkob sa panag-inambitay ug kahiusahan diha sa katilingban nga naningkamot sa pagpakiglambigit sa tanan apan ilabi na niadtong anaa sa daplin sa katilingban aron sila ganuyon balik ngadto kang Kristo hangtud nga aduna lamay usa ka Magbalantay ug usa ka panon. Ang Eyukaristiya adunay sosyal nga bahin, ang iyang kalambigitan nga buot sa Kongreso nga atong tutukan, pamalandungan, ug puy-an.

Busa nahuna hunaan dinhi sa atong Dyosesis nga usahon kining maong duka ka kasaulogan. Ang hiniusang tema nga atong pamalandongan ingon na niini: “Si Kristo diha kanato, paglaum sa himaya alang sa kabos.”

Sa atong pamalandong mahitungod sa Eyukaristiya, atong tutukan ang atong pagpakiglambigit sa mga kabus. Sama nga ang Eyukaristikanhong Ginoo nahilambigit ug nagpakaban sa nagkadaiyang panginahanglan sa tawo nga tungod niini iyang gihatag mismo ang iyang kaugalingon, ang iyang lawas ug dugo, mao usab kita nga nagsaulog sa Misa ug midawat sa Ginoo: nga magpakabana kita hangtog gani sa paghatag sa kaugalingon alang sa mga kaigsoonan diha sa ilang panginahanglan.

Ang mosunod nga mga pamalandong nga gibasi sa katekesis sa Congreso ug bunga sa gihimong Summer Pastoral Institute 2015 maoy motabang kanato. Kini gi andam sa tulo ka mga sentro-pastoral sa Diyosesis: Liturgical Center Formation center, ug Social Action Center. Daghan salamat kanila. Ang ilang pamalandong adunay mosunod nga han-ay:

Ang Eyukaristiya ug ang Gagmay’ng Kristohanong Katilingban;
Ang Eyukaristiya ug ang Misyon sa Simbahan sa Pagpakigdiyalogo;
Ang Eyukaristiya ug ang mga Kabos; og
Ang Eyukaristiya, Si Maria, ug ang mga Kabos

Kining maong pamalandong, gihan-ay aron gamiton sa GKK panahon sa Kasaulogan sa Pulong o sa Hiniusang Pag-ampo isip pagpangandam sa pagbisita kanato sa simbolo sa IEC karong Oktobre. Kining mga pamalandong basahon sa mga GKK ug bisan gani sa parokya. Sa mga GKK mahimo kining hulip sa Komentaryo atol sa Kasaulugan sa Pulong o Hiniusang Pag-ampo. Apan mamahimo usab king basahon alang sa personal nga pagtuon o pamalandong. Gani, adunay gi-andam nga mga pangutana, giya sa pagtuon ug pamalandong. Gisugyot nga maggahin gayud ug panahon, gawas sa Kasaulugan sa Pulong o Hiniusang Pag-ampo alng niini, ug tungod kay ang Eyukaristiya dili kasaulugan diha sa simbahan kon dili kinabuhi uban sa katilingban, adunay sugyot nga buhaton matag human sa pamalandong ug pagtuon.

“Si Kristo diha kanato, paglaum sa himaya alang sa kabos”. Dili lamang kini hitting two birds with one stone, kondili what God has joined together, let no man separate. Dili mabulag ang “Pagpikas pikas sa Pan” ug ang pag alagad sa kaigsoonan, ilabi na sa nanginahanglan.