Paninguhaa ang kasing-kasing nga hinlo

Ika-22 nga Domingo sa Ordinaryong Panahon
Dt. 4: 1-2, 6-8/Ps. 15/Jas. 1:17-18, 21b-22, 27/Mk. 7:1-8, 14-15, 21-23

Dihay estorya sa usa ka tawo nga bag-ong namatay. Nakasulod siya sa langit. Gisuroy siya ni San Pedro aron dili siya masaag didto. Daku ang iyang katingala nga sa kwarto nga iyang nasudlan pulos mga dila man ang iyang nakita, mga dila nga gibitay. Busa miingon siya kang San Pedro, “kahadlok ba niani, nganung pulos man mga dila ania dinhi?” Si San Pedro mitubag, “mao kining mga tawhana nga sa buhi pa sila sa kalibutan maayo lang moestorya ug wala sa buhat, maong dila lang nila ang nahilangit.”

Sa Ebanghelyo, si Kristo nakahigayon sa pagtudlo niadtong mga magtutudlo nga maayong mosulti apan kulang sa buhat. Alang kang Kristo ang tinuoray nga makahugaw sa tawo dili ang pagkaon o unsang mosulod sa lawas, kondili ang unsay mogikan sa kasing-kasing. Ang huna-huna nga malaw-ay, kahakog, kasina, garbo, pagpanapaw ug uban pa maoy makapahugaw sa tawo, ug dili ang porma nga panggawas o sinina o panagway.

Sa unang pagbasa, gipahimangnuan kita nga dili pasobraan o kuhaan ang balaod sa Dios. Sundon lamang nato nga puno sa kaalam ang gipabuhat sa Dios kanato ug dili ang gipabuhat sa tawo.

Gipanghinaut sa ikaduhang pagbasa nga mapuy-an ug mahimo nato ang pulong sa Dios ug dili lamang kita igo sa pagpamati niini. Kini atong mapakita diha sa pag-atiman sa mga sinalikway, mga biniyaan ug mga alaot sa katilingban.

Kulang ang atong pagrosaryo ug pagpunay og ampo o pagtuon sa mga pagtulon-ang Kristohanon ug pag-apil mga kalihukan sa katilingban kung wala kitay aksiyon nga gihimo sa mga nanginahanglan. Kining mga nanginahanglan posible nga ania lang sa atong duol, ang atong nagsakit nga membro sa katilingban, ang luya na natong mga ginikanan, ang anak nga napakyas sa iyang mga desisyon o kaha ang atong silingan nga sa atong pagsabot nanginahanglan.

Busa ipakita ta sa buhat ang atong giampo!