Katolikong Simbahan: Arka sa Kaluwasan

“GAWAS kung ang Dios maoy magtukod sa Balay kawang lamang ang kahago niadtong mga tawo nga nagtukod niini” (Salmo 127:1).

Kini nga mga Pulong nga gilitok sa Dios diha sa Balaang Kasulatan nagapadayag nga ang balay kinsa atong sak-an ug pahisakopan, balay nga iya sa Dios, kay kawang lamang kung ang imong ginsakupan tinukod lamang ug tawo, kay kining balay nga gihisgutan mao kini ang iglesia o simbahan (cf. I Tim. 3:15), usa ka institusyon nga lahi sa mga institusyon nga nanungha karon nga nagdala ug ngalan ni Kristo.

Karong panahona angay gayud kitang magmatngon bisan pa sa mga tawo nga kuno nagawali sa pulong sa Dios apan kini sila nga mga tawhana mao lamang ang nagadani kanato sa pagbuwag sa kamatuoran nga gitudlo kanato sa una pang kapanahonan. Ilang ginatuis ang kasulatan aron lamang makapanlimbong sa katawhan sa Dios, ilang dauton ug gub-on ang tinuod nga pagtulun-an. Apan luyo niining tanan adunay usa lamang ka institusyon nga nagakuyog kanato sa pag-giya, pagtudlo ug pagpa-balaan latas sa mga katuigan, bisan pa nahiapil siya sa paglawig, pagbag-o ug pagsulay niining kalibutana, kanunay siyang mibarog ug nagpabiling lig-on bisan pa niining panahona daghan na ang nanungha aron sa pag-guba niini nga institusyon, apan nagpabilin gihapon kining lig-on ug nagmakanunayon sa pagmantala ngadto sa katawhan mahitungod sa kamatuoran nga gitudlo kanato sa Labaw’ng Makagagahum.

Kini nga institusyon mao kini ang Gingharian sa Dios dinhi sa yuta (Daniel 2:44), ug mao kini ang lawas ni Ginoong Jesukristo diin siya ang punoan (Colosas 1:18, Efeso 5:23).

Mao kini ang Simbahan diin siya mismo ang nagtukod niini (Mateo 16:18), ug kining Simbahana lamang gihatagan ug awtoridad sa pagsangyaw sa kamatouran “Panglakaw kamo ug tudloi ang tanang nasud” (Mateo 28:19-20), ug mao lamang kini ang bugtong haligi ug sukaranan sa kamatuoran (1 Tim. 3:15).

Kining Simbahana nga gitukod ni Ginoong Jesukristo nagapabilin gayud dinhi sa kalibutan ug dili gayud mapukan bisan pa ug guboton kini sa mga kalaban, tungod sa iyang pasalig nga “Bisan ang ganghaan sa kamatayon dili makabuntog niini” (Mateo 16:18).

Ang kasaysayan nagtug-an kanato nga ang Simbahang Katoliko mao lamang ang bugtong Simbahan sa tibook kalibutan nga nagpreserba sa iyang timailhan, awtoridad ug mga pagsimba gikan gayud sa Apostolikanhong panahon, ug diin kini lamang ang Simbahan nga gitukod ni Ginoong Jesukristo: “The Catholic Church is a Divine Society founded by Jesus Christ“ (Grolier Encyclopedia Vol. 5 p. 106).

“The history of the Catholic Church began in the upper room in Jerusalem almost 2000 years ago. Jesus founded the Church to carry all men into salvation“ (The New Book of Knowledge Encyclopedia Vol. 16 P. 237).

Busa sumala sa Kasulatan ug kasaligang mga tinubdan sa kasaysayan gipamatuod nga ang Simbahang Katoliko mao ang Simbahan nga gitukod ni Ginoong Jesukristo; ug mobarog gayud sa kanunay luyo sa mga pagdaut ug pag-guba niini sanglit si Ginoong Jesukristo mismo mipasalig nga kini iyang paga-ubanan hangtud sa katapusan sa kalibutan (Mateo 28:20).

Iya kining giulaan sa iyang bililhong dugo agi ug pagpatik niini (Buhat 20:28). Busa ang Simbahang Katoliko mao ang atong arka sa kaluwasan, ug gikinahanglan nga kita magpasakop gayud niini (Efeso 5:23), kay dinhi nato matagamtaman ang grasya sa Dios, ang tinuod nga pagsimba, ang mga Sakramento nga maoy tinubdan sa pagkabalaan. Ang mga dili magtotoo nga kanunay molimod ug dili modawat sa Simbahang Katoliko, hangtud sa takna sa ilang kamatayon ug nagpabilin sa dili pagpaminaw ug pag-dumili sa pagpahisakop sa Simbahang Katoliko.

Kadtong nagapadayon pagpakasala sa Dios ug sa iyang Simbahan adunay makanunayong dalan sa pagtunglo kang Jesukristo ngadto sa krus. Tinood nga ang Simbahang Katoliko dinhi nahisakop ang tanang makasasala, apan kini nagatimaan nga iya gayud kini ni Kristo kay si Kristo mismo miingon wala siya moanhi alang sa mga matarong kondili sa mga dautan. Busa iyang gitukod ang Simbahan aron ang mga dautan mahimong matarong. Wala magpasabot kong ania dinhi ang mga dautan nawala na ang kamatuoran. Gani ang Simbahang Katoliko kanunay nagasangyaw sa katarung alang sa iyang katawhan pinaagi sa mga kaobispohan ug kaparian (Malaquias 2:7), aron ang tanan makabaton ug kaluwasan (1 Tim. 2:4).