Kapobrehon Dili Babag sa Pangandoy

“Ga-uban ko sa akoang mama ug papa mangguna sa bukid sa una. Usa ka gatus ang adlaw sa panghornal pero kay bata pa daw ko, P50.00 pesos ray ihatag nila nako,” matud pa ni John Razel.

Si John Razel Langi, 12 anyos, gamay ra sa iyang edad, bibo kung tan-awon. Siya nagpuyo sa Cabasagan, Matanao usa sa mga lagyong bukid nga nahimutang sa Davao del Sur. Siya usa sa pipila ka batan-on nga nahatagan ug oportunidad pinaagi sa St. Anthony’s Boys Village Foundation (SABV) nga makaeskwela sa Rogationist Academy-Davao usa ka pribado og katolikong tulunghaan sa Dabaw isip scholar sa high school.

Dili malimod nga ang kapobrehon sa usa ka pamilya ang makababag sa usa ka batan-on nga ipadayon ang pag-eskwela, ug makab-ot ang pangandoy sa kinabuhi. Si John Razel ang kinamaguwangan sa tulo ka magsoon. Sa bukid sila nagpuyo ug ang pagpangguna lang sa sagingan ang nahibaw-an sa iyahang pamilya nga panginabuhian.

Apan sa iyahang pangandoy nga maka-eskwela adunay mitabang niya ug nakapasulod sa SABV, usa ka organisasyon nga gipangulohan sa Rogationist Priests, diin sila gihatagan ug libreng puloy-anan, pagkaon, pormasyon nga ispiritwal, og edukasyon.

Matod pa ni Razel, pinaagi sa pag-eskwela, mamahimo niyang matabangan ang iyahang pamilya nga makahaw-as sa kapobrehon ug mamahimong posible ang iyahang mga pangandoy sa kinabuhi. Gusto pod ni Razel nga maghatag ug inspirasyon sa uban aron makapadayon ug paningkamot ug dili himuong babag ang kasamtangang kahimtang sa kinabuhi aron dili makab-ot ang maayong kinabuhi.

“Sa tanang batan-on pareha nako, padayon mo sa pag-eskwela, kay kini makatabang dili lang sa ato apil na diha ang atoang mga pamilya” dungag niya. (Jecy B. Opada)