Ang Pagsaka sa Langit ug Pagka-Rayna ni Birheng Maria

(Assumption and Queenship of Blessed Virgin Mary)

Atong ginasaulog ang usa sa pinaka-dako nga kapistahan sa atong Simbahan ang Pagsaka ni Birheng Maria Lawas ug Kalag ngadto sa Langit ug ang iyang Pagka-Rayna sa Langit ug sa Yuta kada Agosto 15.

Gatosan na ka mga katuigan ang nanlabay, ang Simbahang Katoliko kanunay nagatamod ug nagasaulog sa kapistahan sa pagsaka ni Birheng Maria sa langit human sa iyang kinabuhi dinhi sa kalibutan o Assumption of the Blessed Virgin Mary o ang pagsaka sa langit human sa iyang kinabuhi dinhi sa yuta.

Kini nga kamatuoran dugay nga giwali ug gitohoan sukad pa sa unang siglo ug usa pod kini nga pagtulun-an nga gidawat sa unang mga Kristohanon. Busa si Papa Pio XII niadtong Nobyembre 1, 1950 mideklara isip opisyal sa usa ka dogma sa atong pagtoo (Dogma of Faith), diha sa iyang sulat o Papal Bull nga giulohan, Munificentissimus Deus: “By the authority of our Lord Jesus Christ, of the Blessed Apostles Peter and Paul, and by our own authority, we pronounce, declare, and define it to be a divinely revealed dogma: that the Immaculate Mother of God, the ever Virgin Mary, having completed the course of her earthly life, was assumed body and soul into heavenly glory”.

Mao kini ang usa sa mga importanting unod sa encyclical letter ni Papa Pio XII sa iyang pagdeklara sa maong dogma. Ang Pagsaka sa Langit ni Birheng Maria lawas ug kalag (Assumption), nagagikan sa pagtoong Katoliko nga siya walay buling sa sala ug hinlo gayud, ug usa kini ka dakong prebilihiyo kaniya, sanglit siya maoy napili nga Inahan sa Dios (Lucas 1:43).

Kining pagtooha nga si Maria misaka sa langit lawas ug kalag lig-on kining gipahimug-atan diha sa Bibliya. Gani diha sa Daang Tugon adunay mga panagna nga ang Ginoo mobangon sa iyang lubnganan, mosaka sa langit uban ang Sudlanan sa Kasabotan (Salmo 132:8), ug kini nga sudlanan sa kasabotan nga gihisgutan walay lain kondili si Birheng Maria, ug dugang pa diha sa libro sa Pinadayag “Unya nagpakita ang usa ka dakong tilimad-on didto sa langit; may usa ka babaye nga nagbisti ug adlaw ug nagtunob sa bulan ug gikoronahan siyag 12 ka bitoon” (Pinadayag 12:1).

Sa samang rason nakita ni San Juan Apostoles ni Kristo ang pagsaka ni Birheng Maria sa langit. Atong mahinomdoman nga si San Juan maoy nag-amoma pagbantay kang Birheng Maria sa katapusang adlaw niya nganha sa Ephesus. Busa kini nga pagtulon-an dayag gayud nga natala sa kasulatan ug gikinahanglan nga atong tohoan.

Ang Pagka-Rayna ni Birheng Maria giproklamar usab niadtong 1954 ni Papa Pio XII pinaagi sa iyang Encyclical Letter nga giulohan ug Caeli Reginam. Kini nga kasaulogan adunay duol nga kalambigitan sa pag-ila sa pagsaulog nato sa pagsaka ni Birheng Maria sa Langit o Assumption of Mary.

Human niya misaka sa langit siya gikoronahan isip Rayna sa Langit ug Yuta. Ang pagka-Rayna ni Birheng Maria binase sa mao gihapong panan-awon ni San Juan Ebanghelista sa Pinadayag 12:1 “Unya nagpakita ang usa ka dakong tilimad-on didto sa langit, may usa ka babaye nga nagbisti ug adlaw ug nag-tunob sa bulan ug gikoronahan siya ug 12 ka bitoon.”

Kining tanang prebilihiyo gihatag lamang kang Birheng Maria tungod sa iyang dakong partisipasyon sa pagpakatawo sa Anak sa Dios (Galacia 4:4) nga maoy niluwas kanato, ug maoy napiling Inahan sa Dios (Lucas 1:43). Kini ang labing dako nga kahimayaan sa hilabihang kaputli niya nga lawas.

Siya karon ang nakig-usa na kang Kristo diha sa kahimayaan sa pagdaug sa sala ug sa mga daotang bunga niini. Apan wala kini magpasabot nga siya usa ka diosa. Sayod ta nga si Maria angay lang gayud nga hatagan niini nga maong mga pribilihiyo tungod pinaagi kaniya nadawat nato ang kaluwasan. Kung wala niya gidawat ang maong tanyag sa Dios siguro hangtud karon wala pa nato madawat ang lihok sa pagpangluwas. Siya apil na sa plano sa Dios sukad pa sa daang tugon (cf.Gen. 3:15).