Sta. Ana: Ang Butihing Lola

Ang Dahon sa San Francisco ug ang Birhen sa Del Carmen

Tuig 2012, di makalimtan ni Mercedes “Nanay Daringding” Jayoma, 76 ang iyang kasinatian sa dihang siya nasamad sa dust pan. Isip PSKB sa Del Carmen GKK, importante kang Nanay Daringding nga makatambong siya sa mga aktibidades sa kapilya. Sa iyang pangidaron, iya pang ginaubanan ang mga kaslonon sa parokya sa San Pablo aron magpa-interbyu. Busa, naningkamut gayud siya nga matambalan ang iyang lawom nga samad.

Sa iyang pagsaysay, usa ka naka brown nga gwapang babaye ang mibisita kaniya ug mitapion ug 3 ka dahon sa San Francisco sa iyang tiil. Dala ang pagtoo, tuod man, pagbalik niya sa doktor, natingala nalang kini kay naayo dayon ang maong samad ug ultimo ulat, wala g’yuy nabilin. “Pag-adto nako sa kapilya, siya (Birhen sa Del Carmen) ang akong nakit-an. Si Mama Mary ang nagtabang nako. ”

Usa lamang kini sa mga milagrong nasinati ni Nanay sa iyang GKK. Busa sa ika-147 nga kapiyestahan sa milagrosang Birhen sa Del Carmen, sa pagpangulo ni Abp. Romulo Valles, siya usa sa mga sayong miabot sa misa aron magpasalamat, Hulyo 16, 2015. “Maskin ginarayuma nako, magpadayon ko samtang may kinabuhi pa,” panapos ni Nanay Daringding. Siya nagsugod sa kapilya isip PSK niadtong dekada 80.

Cluster visitation

Si Ric Rival, PSK sukad 1998 nalipay pag-ayo sa padayon nga kadasig sa iyang ginsakupan.

Matud niya, “Adunay 8 ka clusters ang kapilya ug ang cluster visitation ang usa sa mga nakapaaghat sa ilang pagtuo isip katilingban. Amo silang ginabisita. Ang mga youth sa una ug karon usab, nagtambayayong.” Isip padayon nga pagpasalamat, ang katilingban nagarosaryo sa kapilya kada 6:30 sa gabii sukad niadtong Pebrero. Kini human nga “magsingot” kuno ang kalawasan ug sanina sa Mahal nga Birhen sa Del Carmen.