Propeta sa kanunay

Ika-14 nga Domingo sa Ordinaryong Panahon
Ez. 2:2-5/ Ps. 123/ 2 Cor. 12:7-10/ Mk. 6:1-6

Nganu kaha nga ang bata usahay mas maminaw pa sa maestra kaysa iyang mama, o ang asawa mas maminaw pa sa iyang higala kaysa iyang bana, o usahay mas tuohan pa nato ang ubang tawo kaysa kanunay natong gikauban?

Ang matag propeta gitahod gawas lang sa iyang kaugalingong lungsod. Kini kasinatian ni Hesus. Siya gidawat bisan asa apan gisalikway sa iyang kaugalingong lugar. Kita usab gitawag sa pagkapropeta.

Una, ang propeta makanunayong nagsaksi sa Dios taliwala sa pagsalikway. Mao kini ang gipuy-an ni Hesus sumala sa Ebanghelyo nga gitagna sa unang pagbasa. Bisan gisalikway, si Hesus nagpakaylap sa kaayo sa Ginoo. Pila kaha kanato ang nahimong kataw-anan atubangan sa kadaghanan kay nagtug-an ta sa tinuod, o naglikay sa suborno sa kwarta, o nagtuman sa prinsipyo nga Kristiyano? Pila kaha kanato ang mibarug sa angay bisan kita gisalikway?

Ikaduha, ang propeta misalig sa grasya sa Ginoo. Ang kaalam ug gahum ni Kristo sa pagbuhat og milagro gikatingad-an sa mga tawo kay grasya man kini sa Dios. Kini usab ang gibati ni San Pablo sa paghingpit sa Dios sa iyang kahuyang. Kinsa kaha kanato ang kanunay’ng misandig sa kahanas sa Ginoo? Kinsa kaha kanato ang mapaubsanong midawat nga matag kalampusan tungod sa panalangin sa Dios? Kinsa kaha kanato ang nagpaubos sa kapakyasan nga gitugot sa Dios aron kita moila kaniya?

Ikatulo, ang propeta yano. Tungod kay yano lamang si Kristo nga anak sa panday ug nailhan ang iyang mga kabanay, siya wala tuohi. Apan siya walay katalaw nga mipadayon sa iyang misyon. Giunsa kaha nato pagpabilin nga yano taliwala niining komplikado nga kinabuhi sa computer, cellphone ug uban pang mga gamit komunikasyon ug transportasyon karon? Giunsa kaha nato pagkakita sa presensiya sa Ginoo sa gagmay’ng mga butang nga atong nadawat matag adlaw?

Tungod sa atong bunyag, ikaw, ako ug kitang tanan gitawag sa pagkapropeta sa kanunay.