Parokya nangandam sa Diamond Jubilee

NANGANDAM na ang Parokya sa San Jose nga Mamumuo sa lungsod sa Sta. Cruz alang sa pagsaulog sa ika-75 nga kasumaran sa maong parokya nga saulugon sunod tuig. Pinanguluhan ni Rev. Fr. Ronald “Bong” Lunas, kura paruko gipahigayon ang labing unang coordination meeting niadtong Hulyo 4, 2015 didto sa kumbento sa parokya ug gisalmotan sa nagkalain-laing miyembro sa komitiba sa Diamond Jubilee.

Sa maong meeting, nasabutan sa kadaghanan nga magpahigayon ug mga aktibidades aron mahimong mabulukon ug sadya ang selebrasyon. Matud ni Fr. Bong, importante kayo ang kasaulogan sa Diamond Jubilee sunod tuig tungod kay kini magpahinumdum sa tanang parokyano sa kamugnaan sa parokya ni Sr. San Jose ang Mamumuo. Dugang niya nga kini mao ang pinakaunang parokya sa tibuok Davao del Sur diin nahilakip pa gani ang Davao City kaniadto. Gilagbit-saysay usab niya nga ang San Jose ang Mamumuo kaniadto sakop pa sa Diocese of Zamboanga isip bugtong Diocese sa tibuok isla sa Mindanao.

Ang naglangkob sa Committee on Diamond Jubilee celebration sunod tuig mao ang mga parokyano nga dunay kaikag sa pagtabang aron magmalampuson ang kasaulogan sunod tuig.

Lakip sa nasabutan nga mga kalihukan mao ang pagbuhat ug souvenir programme, pagpahigayon ug socio-cultural activities, pag-imbitar sa mga lumulupyo nga nilangyaw na sa laing nasud, paghimo ug sports activities, ug uban pa. (Julius R. Paner)