Pangulo sa Simbahan ni Kristo

USA sa mga pundasyon sa pagtulun-an isip usa ka Kristohanong Katoliko mao ang pag-ila nato sa Santo Papa isip mao ang nag-inusarang Pangulo nga nagdumala sa tibook Simbahan ni Hesukristo.

Luyo niining tanan, adunay dili makadawat niini nga pagtulun-an ug pag-ila sa Santo Papa isip makita nga lider sa Simbahan ni Kristo dinhi sa yuta.

Gani adunay mga pipila ka pundok nga moingon nga ang Santo Papa mao ang anti-Kristo kuno. Subo pamalandongon nga modugang pa sila sa pag-ataki sa pag-ingon nga ang Santo Papa usa ka 666.

Kining tanan nga ataki nila bahin sa lider nga gipili ni Hesukristo, kabahin lamang nga moagi gayud sila sa mga pagsulay sa mga tawong dili buot maghari si Kristo. Ang Ginoo namulong nga bisan pa ang iyang mga tinun-an biay-biayon gayud, butang-butangan sa matang sa kadautan ug bugal-bugalan. Mao kini ang nahiagoman sa Santo Papa, ang bugtong gipili sa Dios nga maoy modumala sa iyang Simbahan dinhi sa kalibutan.

Busa atong susihon karon kung ang ilang pasangil husto ba? Hisgutan nato nga ang Santo Papa mao gayud ang lider nga gipili ni Ginoong Hesukristo nga iyang kahalili dinhi sa yuta o Vicar of Christ.

Sumala pa sa tudlo sa atong Simbahan “The title pope, (from Latin: papa; from Greek: πάππας (pappas), an affectionate word for father) once used with far greater latitude, is at present employed solely to denote the Bishop of Rome, who, in virtue of his position as successor of St. Peter, is the chief pastor of the whole Church, the Vicar of Christ upon earth”. (“The Pope.” The Catholic Encyclopedia. newadvent.com).

ANG Santo Papa mao ang Obispo sa Roma. Siya ang magbalantay sa katawhan sa Dios nga mao ang Simbahan ug kahalili ni Kristo dinhi sa yuta. Siya ang bugtong sumusunod ni San Pedro. Sa Mateo 16:17-19 dayag kaayo ang paghatag ug gahum ni Kristo kang San Pedro isip unang pangulo sa Simbahan nga iyang gitukod.

Gikan sa ngalan nga Simon si Kristo miilis kaniya sa ngalan nga Cefas sa griego Petros nga ang kahulogan bato (Juan 1:42).

Sa dose ka mga Apostoles, si Pedro lamang ang giingnan ug gitugyanan ug awtoridad ug gahum ni Ginoong Jesukristo, diha sa pagtukod niya sa iyang Simbahan, “Busa sultihan ko ikaw: Ikaw si Pedro, Bato, ug ibabaw niining bato tukoron ko ang akong Iglesia, ug bisan gani ang ganghaan sa kamatayon dili gayud makabuntog niini. Ihatag ko kanimo ang mga yawi sa gingharian sa langit, ang imong itugot dinhi sa yuta, itugot ko usab didto sa langit, ang imong idili dinhi sa yuta, idili ko usab didto sa langit“ (Mateo 16:18-19).

Diri atong masabot nga si San Pedro lamang ang bugtong Apostoles nga gihatagan ni Kristo ug katungod nga maoy magdumala sa iyang Simbahan dinhi sa Kalibutan, ug gani sa listahan sa mga Apostoles siya maoy nag-una (Mateo 10:1-4), usa siya sa misaksi sa pagka-usab sa dagway ni Jesus o transfiguration (Mateo 17:1-13), pag-ampo ni Jesus sa tanaman sa Getsemane (Mateo 26:36), ang unang misangyaw sa ebanghelyo ngadto sa Jerusalem (Buhat 2:14), ug ang nangulo sa konsilyo sa Jerusalem uban sa mga tinun-an ni Kristo (Buhat 15:1-21). Sa pagkabanhaw ni Kristo sa wala pa siya mosaka sa langit gipahinomdoman siya nga daan sa iyang obligasyon sa pagdumala sa iyang katawhan.

“Human sila makakaon miingon si Jesus kang Simon Pedro, Simon, Anak ni Juan gihigugma mo ba ako labaw sa imong paghigugma sa uban? Siya mitubag, “Oo, Ginoo nasayod ka sa tanan, gihigugma ko ikaw”, si Jesus miingon kaniya, “Atimana akong mga nating karnero.” (Juan 21:15-17).

Ug si Pedro gilig-on ug giampoan ni Jesus aron dili siya mabuntog ug malig-on niya ang iyang mga igsoon (Lucas 22:32).

Busa klaro ang pagpadayag diha sa kasulatan nga si San Pedro mao ang Pangulo sa Simbahan uban sa iyang mga sumusunod nga mao ang Santo Papa sa Roma.

Siya miadto ug nagwali sa ebanghelyo didto sa Roma, ug siya nagtukod sa Simbahan didto hangtud nga siya gipatay sa paglansang nga patuwad ni Emperor Nero panahon sa iyang pagpanglutos sa mga Kristiyanos sa tuig 64 A.D. Gikan kang San Pedro hangtud karon kay Santo Papa Francisco, wala gayoy pagkabugto ang ilang kutay sa pagdumala sa Simbahan ni Ginoong Jesukristo dinhi sa kalibutan. Mikabat 265 ka mga Santo Papa gikan sa una natong Santo Papa nga si San Pedro.