Pagbag-o sa GKK Guidelines Gipasabot

ATUBANGAN sa mga pastoral agency workers diha sa 2nd Archdiocesan Pastoral Agencies Gathering (APAG) niadtong Hunyo 30, gipaambit ni Yanong Muloy ang iyang mga kasinatian ug tubag sa mga kasagarang pangutana bahin sa bag-ong Guidelines and Norms on the Gagmay’ng Kristohanong Katilingban (GKK).

Unsay katungdanan sa Obispo?

Bag-o pa man muabot ang full implementation karong Nobyembre, gipaklaro na niyang daan ang iyang katungdanan: “Isip Obispo subay sa kinaiyahan sa Simbahan, ako magpromulgar niini; ang moingon nga mao ni atong gamiton. Sama sa gisulti nga gikan ni ninyo. N’ya mag-ampo, tan-awon unsay angayan alang sa mga tawo kay produkto (yellow booklet) man ni sa atong collective wisdom. I am very confident nga kini lihok sa usa ka participative church; ang gidamgo sa Plenary Council of the Philippines (PCP) II usa ka tatak sa Simbahan sa Davao. I can defend kay bunga man kini sa simbahan sa katawhan sa Diyos.”

Unsay mahitabo kung aduna pay suhestiyon gikan sa uban?

“Definitive na gyud ni sa pagkakaron. Kung dunay mga bright pa na opinion maybe sa next nga panahon pa na ma-improve. Sa pagkakaron, mao g’yud ni atong desisyunan nga gamiton. Nindot kini nga libro, pero ang kaanindot ani makita sa inyong mga nawong. Produkto kini sa communal discernment. The church is not an organization; it’s sacramental; the mystical body of Christ.

******

Ang daan (Green Book) dili na sibu sa realidad. Ang simbahan sa Dabaw uban ang mga lideres sa GKK human ang pila ka tuig nga kasinatian, padayon nga nagapangutana ug nagamugna ug mga estratehiya aron mulambo. Sa nasinati, adunay mga batasan sa mga lideres nga kinahanglan nang bag-ohon, ug kulang na sa pag-atubang anang mga tendency ang GB. Sa bag-ong Guidelines (Yellow Book), mas gipasabot pa pud ang membership diha sa GKK.

Sa pangutanang unsay basehan sa kabag-ohan, si Yanong Muloy mihatag ug tulo: 1) collective wisdom and consultation; 2) data on minutes of meetings; ug 3) clergy meetings.

Kahinumduman nga ang pagbag-o tuig 2008 pa giplano diin pipila ka mga pari ang gitahasan sa pagpanday niini. Dayon, niadtong 2009, mipatawag sab ug pastoral assembly apan wala kini madayon, hangtud sa 2012, sa pag abot sa bag-ong Arsobispo, nasugdan na gayud ug nahuman ang Guidelines.