Nangita ka ba kang Hesus?

Ika-18 nga Domingo sa Ordinaryong Panahon
Ex. 16:2-4, 12-15/Ps. 78/Eph. 4:17, 20-24/Jn. 6:24-35

Kung ikaw gipakaon ni Hesus, dili ka kaha mangita kaniya? Kung natabangan ka niya sa imong problema, dili ka kaha mangita kaniya?

Natubag ni Kristo ang kagutom sa mga tawo sa dihang iyang gipakaon sila sa pan. Mao nga daghan kanila nangita kaniya. Apan sayod si Kristo nga sila nangita kaniya dili tungod kay nakasabot sila sa iyang gibuhat kondili tungod kay nangabusog sila.

Sa pagpakaon sa Ginoo sa mga tawo, buot niya nga makaamgo sila nga ang Dios buhi uban kanila. Buot niya nga mapuno sila sa pagtuo inay magbagulbol sa ilang kahimtang sama sa nadungog nato sa unang pagbasa. Ang Dios nga naghatag kanila’g pagkaon maghatod unta kanila sa pagbag-o, sa pagbiya sa makasariling pangandoy lamang ingun sa nadungog nato sa ikaduhang pagbasa.

Kita usab giawhag sa pagpangita sa Ginoo dili lamang tungod kay kita nakadawat og pabor. Ang pagpangita nato sa Ginoo mapadayag unta nato diha sa pagpaningkamut sa pag-angkon sa mga butang espirituhanon ug dili lamang materyal ug kalibutanon. Mapakita sa tinuod pagsabut sa pagtuo nga atong gipuy-an.

Ang tawo nga tinuod nangita sa Ginoo molikay gayod sa kagubot ug pagdumot. Ang tinuod nga nangita sa Dios malipay nga makakat-on sa mga pagtulon-ang nga nasabtan. Dili siya ulipon sa mga hitsas ug gamit teknolohiya aron lamang sayon ang iyang pamuyo. Mas palabihon niya nga molambo ang iyang batasan ug taras kaysa hitsurang panlabas. Dili siya maluya bisan sa daghang problema. Ang tawong nangita sa Ginoo kanunay magkugi sa pagbuhat og maayo bisan walay nagtan-aw – sa kadalanan man o palengke, sa trabaho man o pamilya, sa eskwela man o barkada.

Ang makapabusog sa tawong nangita sa Dios mao ang buhat nga maayo, bisan siya sulayan pag-ayo. Natubag man ang atong problema o wala, busog man kita o gutom mangita unta kita kanunay sa Dios pinaagi sa maayong buhat tinukmod sa pagsabot sa kanunay Niyang presensya.