Misyonerong Disipulo

Ika-15 nga Domingo sa Ordinaryong Panahon
Amos 7:12-15/Ps. 85/Eph. 1:3-14/Mk. 6:7-13

Matud pa ni Santo Papa Francisco sa iyang sulat Evangelii Gaudium kon Kalipay sa Ebanghelyo, ang matag binunyagan gikan sa una hangtod sa katapusan, mga misyonerong disipulo. Sama sa unang mga tinun-an ni Kristo, kita usab gitawag sa pagkamagsasangyaw sa Maayong Balita. Kita nga nakadawat sa gugma ug kaayo sa Ginoo, giawhag sa pagpaambit niining maong kasinatian ngadto sa uban ubos niining mga mosunod nga kinaiya.

Una, ang misyonerong disipulo masaligon sa panabang sa Ginoo. Sanglit dili iyang kaugalingon ang gisangyaw kondili ang gugma sa Dios, siya mosalig nga mohatag ang Dios sa iyang panginahanglan. Sa Ebanghelyo, si Kristo mihatag kanila og pahimangno unsay kinahanglan dalaon ug angay bitbiton. Matud sa ikaduhang pagbasa, kita gipanalanginan ug gipili na sa Dios. Kung ato lamang himuon ang kaayo ngadto sa uban, ang Dios na ang bahala mohatag kanato sa atong panginahanglan.

Ikaduha, ang misyonerong disipulo malig-on taliwala sa pagsalikway. Kung dunay dili modawat kaniya sama sa nadungog nato sa unang pagbasa ug sa Ebanghelyo, mapadayunon siya nga mopugas sa maayong batasan ug dili mobiya sa pagbuhat sa kaayohan. Dili siya moundang ug magpadaug tungod sa kasakit nga iyang natagamtam tungod sa pagtamay sa uban kay nasayod siya nga kining iyang gihimo alang sa Dios.

Ug ikatulo, ang misyonerong disipulo makugihong molambigit sa kadaghanan. Giayo sa mga tinun-an ni Kristo ang daghan kaayong mga tawo. Niining paagiha, matud sa Salmo, napakita ang kaayo ug kaluwasan sa Ginoo. Busa, dili lamang unta kita moduol sa mga nakauyon kanato ug sa mga aktibo sa katilingban kondili kang bisan kinsa aron mapaabot nato ang pagdawat sa Dios sa tagsa-tagsa.

Ang pagsalig, kalig-on ug kakugi mga hiyas nga angay batonan sa misyonerong disipulo. Sanglit binunyagan man kita, matag usa misyonerong disipulo.