Healing priest nagpahigayon og Recollection

Ang Inner Healing Recollection gipangunahan ni Rev. Fr. Cris B. Violon, D.C.D. subay sa temang “God’s Love Heals” niadtong Hulyo 5 sa Mediatrix Lay Formation Center, Digos City.

Kapin 500 ang miapil sa rekoleksyon. Gikalipay sa mga parokyano ang tabang ni Fr. Violon una pa man kini muadto sa Tagaytay aron mu-eskuwela sulod sa tulo ka tuig. Mensahe niya sa sa mga parokyano, “…importante atong pagtuo sa Ginoo…mag-ampo ta aron sa kaayohan.”

Iyang gipasibaw ang kahalangdon sa istruktura sa Katolikong Simbahan sa dihang iyang gipamalandong ang katawhan: “…naa tay GKK kumpleto na ta’g structure, kumpleto na ta’g network, ibog ang Protestante nato, kay nahiusa ta tungod sa atoang network ug structure, tibouk kalibutan duna tay Santo Papa, sa kanasuran Kumpirensya sa Kaobispohan, sa probinsiya Obispo,sa mga lungsod Parokya, sa baryo Purok Cluster, sumpay tanan, kunektado tanan. Pero kumusta naman ang unod, naa naman ang porma. Unsaon man nato nga niining atoang gambalay, mangunod ta sa gugma, diyosnong pagbinatiay, pag-atimanay, pag-ilhanay. Nasugdan na pareho nato, palambuon nato, maona mag-ampo ta sa mga masakiton. Ato ning palambuon, sugod sa ginaingon nga magrosaryo, Divine Mercy Chaplet, ug uban pa nga mga nobena. Kay kun di nato ni lihukon padayon madagit atong mga kaigsuonan nga gibiring-biringan sa mga dili-ingon nato, ang mga tao na sa balatian, naa sa crisis. Ug kon ang tao naa sa crisis, dali siya matandog sa mga lihok-gugma.”

Human sa rekoleksyon, misunod dayon ang santos nga misa ug Anointing of the Sick. Panapos niya, “Kita magmalig-on unta sa Espiritiu nga maoy kahayag, pagbag-o ug kahiusa. Siya dili nato makita, apan atong mabati ug masinati sa lig-on nga pagtoo.” (Nemric Kiel Umali)