GKK Servant Leadership Training sa Bikaryato sa Immaculate Conception

ARON pagbalik-lantaw sa kasinatian diha sa mga naka-mao hilabina sa pagdasig sa pagtoo alang sa mga pangulo, gipahigayon sa Artsidiyosesis sa Dabaw ang 2 ka adlaw nga GKK Servant Leadership Formation and Training niadtong Hulyo 3-4, 2015 sa Virgen Dolorosa Parish, Babak, Island Garden City of Samal.

Ang maong training gisalmutan sa 3 ka parokya sa Samal Island, ang Sto. Niño Parish, Immaculate Conception Parish og Virgen Dolorosa Parish. Ang nagdumala sa training mao sila si Fr. Pedro Lamata. Fr. Bong Dublan, Bp. George Rimando, ug Vicky E. Anghag sa pastoral office.

Gitumong sa seminar ang pagpadayag sa pagsabot, og pagbati ug kahinam diha sa pagsunod kang Kristo isip usa ka alagad nga pangulo. Usab gipasabot kanila ang namaohan na nga mga buluhaton ug kalihukan sa simbahan.

Usa sa mga partisipante Julieta Bejod, PSP Parish Coordinator sa ICP Julieta Bejod mipaambit sa iyang tumang kalipay, tungod sa oportunidad nga gihatag kaniya nga makaapil gayod sa maong training. Daghan siya ug nakat-unan dili lang isip pangulo sa ilang parokya ug GKK, apan isip lider usab sa ilang barangay.

“Aron matawag kita nga good leader kinahanglan nga kita maalagaron ug mapa-ubsanon ug himoong modelo si Kristo diha sa adlaw-adlaw nga kinabuhi aron makab-ot ang kahusayan ug kalipay diha sa Kristohanong kinabuhi”, matud pa ni Milagros Maaghop, Parish Formator sa Sto Niño Parish, Kaputian.

Malipayon ang mga partisipante sa ilang pag uli ug sa pagpadayon nga pag-alagad kang kristo. Sila magpaambit sa katawhan sa ilang nakat-unan aron mapahingpit ug mas mulawom pa ang ilang pagtoo kang Kristo. (Merry Love Asoy)