Courtesy Call to Bishop Alo by new PNP Provincial Director ‘Tigpa-hiusa’ (Mati Newsbits)

Courtesy Call to Bishop Alo by new PNP Provincial Director ‘Tigpa-hiusa’

NAG courtesy call kang Diocese of Mati Bishop Emeritus Patricio H. Alo ang bag-ong Provincial Director sa Dvo Oriental Provincial Police Office (DOPPO) dili pa lang dugay. Malipayong gihimamat ni Bishop Alo si Police Senior Supt. (PSS) Joseph Sepulchre ug mga kaubanan kung diin nakabaton ug higayon nga magkasulti-anay ang duha. Sa pagkadungog sa Obispo sa apelyedo nga “Sepulchre”, gipahayag pa niya nga ang buot ipasabot sa “sepulchre” mao ang panaghiusa, o tigpa-hiusa, mao kini matud pa, ang tahas sa Provincial Director nga hi-usahon ang katawhan sa Dvo Or. Gibatbat usab ni Sepulchre ang kasamtangang sitwasyon sa kahapsay ug kalinaw sa probinsiya, ug gihulagway ni-ini nga “malinawon sa kinatibuk-an ang probinsiya nga ginasamok lang sa pipila ka mga dili maayong panghitabo”.

Gibutyag usab sa Prov’l Director ang nag-unang pagpaningkamot karon nga mao ang pagduso sa eco-tourism potentials ning probinsiya, agig pagtamod sa mga tutok karon sa probinsiyal nga kagamhanan. Ug sama sa una gayod niyang katuyuan sa pag-courtesy call sa Obispo, nangayo ug panalangin si Sepulchre alang sa iyahang pagpalakat sa puwersa sa kapulisan sa kinatibuk-ang probinsya. Nahimamat usab sa Provincial Director ang mga kadagkuan sa Trinity Cable Television (TCTV) sa pagpanguna nila ni Sr. Melvin Manligoy ug Engr. Alan Huertas, samtang nahinabi usab siya sa news team sa DXHM/DXDV sa pagpanguna ni Ms. Leonila Duallo.

‘Safe pa gihapon ang siyudad sa Mati, katawhan involved’

Gipahayag kini mismo ni Police Supt. Ariel Acala, ang Chief of Police sa City of Mati PNP. Kini bisan pa man sa mga dili maayong insidente nga nahitabo sa siyudad sa nangaging mga adlaw. Gani, gikalipay sa Opisyal nga sa mi-agi nga selebrasyon sa Citihood Day, Pujada Bay Festival, ug Araw ng Dvo. Or., nanggawas ang katawhan ug nag-involve kon miduyog gayud sa mga selebrasyon, lakip sa managlahing aspeto niini, secular man o relihiyoso. Ug dili kini mahitabo kung wala gibati sa katawhan nga luwas sila sa pagduyog sa mga kasaulogan. Busa, angay lang matud pa, nga ihimakak sa taga Mati ang mga panlantaw ug mga istorya nga dili na safe ang Mati. Angay lang nga i-enjoy sa mga lumulupyo ug sa mga bisita ang mga garbo nga mga destinasyon sa siyudad. Hinoon, hugot niya nga gihangyo ang supporta ug kooperasyon sa publiko aron malihok ug masulbad ang mga kaso nga nahitabo sa siyudad. Giduso pa niya nga dili makaya sa kapulisan nga mag-inusara sa pagpakigbatok sa krimen, apan mahimo ug molampos lang sila sa pagpakigbatok ni-ini kung ana-a gayod ang supporta ug kooperasyon sa publiko, diha sa paghatag kanila sa mga gikinahanglan nga impormasyon.

Mga nangaging kapistahan

Malipayong Pista ni San Benito sa mga madreng Benedictina sa Order of St. Benedict (OSB) sa St. Scholastica’s Enfide Institute, Brgy Dawan, City of Mati niadtong Hulyo 11, 2015. Human sa prusisyon ug kasaulogan sa Eukaristiya, gipang-ambitan sa mga kiyosko nga kawayan ang abunda sa mga naani nga saging, mangga, pinya, nangka, kamote, kan-on nga pula, mga sud-an nga kaldereta, humba, sinabawang manok ug kanding, suman, minatamis nga mango float, kamote piyaya, ubp. Ug ingon man, pagkaon sa diwang tawhanon pinaagi sa mga presentasyon sa pulong, awit ug sayaw paingon sa ‘Pag-amping sa Kinaiyahan’ ug sa ‘…pagkinabuhi diha sa mapaubsanong pakig-uban sa atong Diyos’ (Miqueas 6:8b). Dugang detalye kabahin niini isulat ni S. Evangeline Madayag, OSB sa mosunod nga isyu.

Malipayong Fiesta usab sa atong Mahal nga Birhen sa Monte Carmelo niadtong Hulyo 16, 2015 — pista sa mga Madreng Carmelita sa ilahang monasteryo sa Tua-tua, Mati City, ug sa susamang adlaw usab, sa parokya ni San Salvador del Mundo sa labing karaang parokya sa Caraga, Davao Or. Mapasalamaton ang katawhan sa Diyos sa mga panalangin nga ispirituhanon ug materyal, nga gipangambitan usab sa tanan, sa maayong kabubut-on sa mga sponsor sa matag adlaw.

(Sa sunod namong pagbalita, adunay pagpaklaro sa NFA nga walay synthetic rice sa siyudad sa Mati)