Be Brave: Live Christ, Share Christ – Pagpatuman sa mga gisugyot sa DPA 6

Mapasalamaton kaayo ako sa mga paningkamot sa daghan natong mga magtotoo ug mga lideres sa atong Diyosesis, gikan sa hut-ong sa atong mga kaparian, relihiyoso ug mga layko, nga misalmot sa ika-6 nga Asembliya Pastoral (DPA 6), sa iyang pagpangandam, pagsaulog, ug pagtapos sa mga dokumento niini. Nagmabungahon kaayo ang panaglambigitay ug pagtinabangay alang niini nga gipamatud-an sa pag imprinta ug pagmantala sa opisyal nga mga dokumento sa maong asembliya pastoral.

Human sa pagsusi nako sa maong mga dokumento, akong paghukom nga mahimo nang ipatuman ang mga gisugyot nga programa ug kalihokan, aron mapatuman ang mga kalamboan sa pagtoo ug kausaban sa kinabuhi, nga gitinguha ug gituyo niining mga sugyot.

Busa, isip Obispo sa Diyosesis sa Digos, akong gimando nga ang tanang hut-ong sa atong diyosesis – kaparian, relihiyoso, ug mga layko, ang tanang institusyon, ug tanang ahensiya pastoral, ang mga lainlaing tulunghaan Katoliko, magtinabangay ug maglambigitay sa pag organisa ug pagplano aron matagaan og katumanan ang mga gisugyot sa DPA 6.

Ang mga delegado sa DPA 6 maoy manguna sa pagpahigayon sa implementasyon sa mga gisugyot.

Ang mga diyosesanong ahensiya pastoral gimandoan usab nga ipahigayon ang pagtabang sa pagplano sa implementasyon sa mga gisugyot sa DPA 6.

Pagahimoon kining pagmantala karong Hulyo 24, 2015, didto sa Mary Mediatrix of all Grace Cathedral, kanus-a ang tanang mga delegado sa DPA 6 tigumon pag usab alang sa hiniusang pagdawat sa mga opisyal nga dokumento ug unya manguna sila sa pagpatuman niini ngadto-ngadto.

Angayan nga hinumduman nato sa pagpatuman niining mga gisugyot sa DPA 6, nga ang gipunting niining tanan mao nga makatabang kita nga si Jesus, maila pag ayo sa tanan, mahigugma sila kaniya, ug mahisama kaniya sa gugma ngadto sa Dios Amahan, ug mahisama sa iyang duyogkasakit alang sa isigkatawo ilabi na ang mga kabus.

Atong itugyan ang tanan natong paningkamot kaniadto, karon ug sa umaabot ngadto sa pag-ampo sa atong mahal nga Patron sa diyosesis, si San Isidro Labrador, ug sa atong mahal nga Inahan, si Maria Tigpataliwala sa tanang Grasya, aron magmabungahon kining tanan alang sa kaayuhan sa tanan ug sa kahimayaan sa atong Maloloy-ong Dios Amahan, Anak, ug Spirito Santo.