37 Days: Ang Milagro sa Dagat Pacifico

KAPIN beynte anyos lamang si Bert Lagos kadtong misulay siya pagsulod sa seminaryo. Apan wala siya madawat. Busa, gikalimtan nalang sa niya ang pangandoy nga mahimong pari.

Apan bisan pa man tuod, nga wala dawata, mipadayon kini sa pagserbisyo sa Simbahan isip assistant sa ilang parish priest sa Jose Abad Santos. Panahon pa kadto sa mga PME fathers, tuig 1971.

Ginakuyugan niini ang mga PME fathers. Usa ka adlaw, adunay iskedyul nga misa sa usa ka GKK sa isla. Ug uban ang unom pa, misakay sila sa baroto ug naninguha nga maabtan ang kasaulogan.

Buntag kato. Paglabay sa pipila ka oras, natingala na lang sila nga milayo na sila sa isla. Miabot ang gabii ug didto, nagsugod na ang ilang kabalaka. Miulan ug miabot ang dagkong balod. Ang mga bata (altar boys ug lectors) nagsugod na ug hilak. Daku na ang ilang pagmahay sa pag-uban sa grupo. Apan giingnan sila sa pari nga muabot ra ang bangka ugma damlag balik sa baybayon. Apan, daghan pang ugma ang milabay, napahilayo na hinuon ang ilang sakyanan sa isla. Hangtud sa milabay ang duha ka semana.

Ang pangutana giunsa nila pagkinabuhi sulod sa pipila ka adlaw?
Matud pa ni Bert, way undang ang ilang pag rosaryo ug pagdayeg sa Ginoo.
Mupahulay ra sila kon matulog ug mukuha ug isda aron kaunon.
Klaro kaayo ang ilang intenyon kun mag-ampo.
Ug uhawon, mangayo ug ulan aron naay mainom.
Kon gutomon, mangayo ug mga isda nga muduol sa bangka aron panakpon.

Usa ka adlaw niana, sa ilang pag-ampo, duha ka dagkong pawikan ang kalit lamang nga miduol sa bangka. Salamat sa kutsilyong dala, nakaon ra ang duha.

Milabay ang 20 ka adlaw ug nadawat na nila ang ilang kapalaran.
Wala nay hilakay, kundili kasabotan.
Kung kinsa man ang unang mamatay, ampuan nalang ug ilabay sa Dagat Pacifico.
Kinsa pa may magdahum nga sila buhi pa?
Ultimo ang ilang tagsa-tagsa ka banay, nangandam na sa ilang 40 days.

Apan usa lang ang gikatingala ni Bert, wa gayud naluya sa panglawas ug espiritu ang pari nga misyonero, samtang sila ug mga kauban niya nangaluya na.

Ulan, init, uhaw, gutom, kawad-an sa paglaum, kamingaw sa pamilya, pagmahay — ila na kini tanang naagian.

Apan, buotan ang Diyos. Usa ka adlaw niana, nakit-an ra gayud sila sa usa ka international Japanese vessel sa dihang sila mitabok sa ruta niini.

Sa pagkakita nila sa barko, nawala ang tanang kaluya. Ang mipuli, kalipay.

Sila gidala dayon sa army hospital. Ug tungod kay wala pa may eroplano gikan sa ilang nahimutangan, miagi sila sa Australia diin didto gidawat sila sa Filipino community. Gisaninaan ug bag-o, gipakaon, ug gisuroy.

Kalit nga misikat ang grupo ni Bert.
Daghang media sa Manila ang misugat nila.
Malipayon ang ilang tagsa-tagsa ka pamilya sa dihang nakauli na sila.
Testimonya dinhi, testimonya didto.

Ang resulta, mas nahimo silang madasigon sa pagtuo, hangtud sa ang seminaryo na mismo ang mipatawag kaniya sa edad nga sobra 30.

Karon si Fr. Bert “Tatay” Lagos kapin 70 na, apan nagapadayon pa gihapon siya sa pagserbisyo isip pari sa San Isidro Labrador, Diocese of Digos. Ang grupo naga reunion pa gihapon, ug kasagaran nila anaa gihapon sa pagpangalagad sa Simbahan. (Cheryl Vilog | Janin Langoy)