Tuig alang sa Kinabuhing Hinalad

Niadto pang Nobiyembre 30, 2014 gideklarar ni Papa Francisco ang maong tuig alang sa kinabuhing hinalad uban sa panghinaot nga pinaagi niining kasaulogan madasig ug mapalig-on pag usab ang ilang kalipay sa pagpadayon sa ilang bokasyon ug misyon.

Sa laing bahin, ang ubang bahin sa Simbahan, sila nga mga Pari ug Layko makaamgo ug magmapasalamaton pa gayud sa kabililhon sa bokasyon ug misyon sa mga Relihiyosong hinalad ang tibuok nilang kinabuhi ngadto sa sa Dios.

Magtapos ang maong kasaulogan sa Pebrero 2, 2016.

Sa karon, anaay 17 ka buok kongregasyon sa mga relihiyoso nga kauban nato sa pagtubag sa atong bokasyon ug misyon isip Simbahan dinhi sa habagatang Mindanao. Ania sila nga ipaila-ila nako kaninyo:

Ang tua sa pinakalayong dapit sa lungsod sa Jose Abad Santos, sa Nuing Mission Station, mao ang mga REDEMPTORISTS. Nangalagad sila ug nakig uban sa mga LUMAD nga MANOBO ug B’LAAN didto sa kabukiran, apil na ang mga Bisaya nga naa sa kapatagan.

Didto mismo sa poblasyon sa Jose Abad Santos, tua ang atong mga kugihan, mataunabangon, ug malipayon nga mga madre nga CARMELITE MISSIONARIES. Sila ang nagdumala sa atong Holy Cross of Caburan. Kapin sa katunga sa mga estudyante mga Lumad nga Manubo.

Mangadto kita sa Malita diin mahimamat nato ang dugay nang nagdumala sa Holy Cross of Malita, ang mga PRESENTATION OF MARY SISTERS. Nahilambigit usab sila sa edukasyon sa mga lumad, nga mga TAGAKAULO. Kauban usab nila ang tua sa lungsod sa STA.MARIA, sa Holy Cross of Sta. Maria. Didto sa Malalag, sila gihapon ang nagdumala sa tulunghaan sa Simbahan, ang Holy Cross of Malalag. Sa katapusan, ang mga PM Sisters mao usab ang nagdumala sa St. Michael’s School of Padada, Sa ato pa, dako kaayo silang natabang alang sa edukasyon sa atong mga kabataan sa dugay na nga panahon.

Didto sa kabukiran sa Malita, atua ang mga MISSIONARIES OF JESUS. Sila ang gisangunan karon sa Malita Tagakaulo Mission nga gisugdan sa dekada setenta sa mga PME FATHERS.

Sa lungsod sa Sulop, adunay Holy Cross of Sulop nga gidumalahan sa mga APOSTOLIC DAUGHTERS OF MARY. Sama sa kadaghanang mga kongregasyon diri sa diyosesis, sila usab nangalagad pinaagi sa pagpahigayon sa edukasyon sa atong mga kabatan-onan.

Bag-o pud nga miduyog sa atong misyon diri sa diyosesis, mao ang mga PIARIST FATHERS. Sila karon ang nagdumala sa Holy Cross of Kiblawan ug sa pastoral care sa distrito sa Molopolo sa Parokya sa Kiblawan.

Ang usa nga dugay na kaayong nakig uban kanato mao ang mga DOMINICAN SISTERS OF THE TRINITY. Duha ka tulunghaan ang ilang gidumalahan — ang Holy Cross of Hagonoy, lungsod sa Hagonoy, ug ang Holy Cross of Magsaysay sa lungsod sa Magsaysay. Mga Dominican Sisters usab ang nagdumala sa Dominican Hospital.

Sukad pa niadtong pagsugod niining bag-ong milenyo, ania na nakig uban kanato ang mga CAMILLIAN SISTERS OF THE SICK. Naa sila sa Parokya sa San Isidro, Digos City nagdumala sa temporary shelter alang sa mga babayeng tigulang ug masakiton nga gitawag Balay ni Maria Domenica, sa Lim Extension.

Kaninyong tanan nga mga lalaki ug babaye nga tibuok kinabuhi gihalad sa Dios ug nangalagad diri sa Diyosesis sa Digos, wala ako’y igong mga pulong ikapasalamat kaninyo alang sa inyong kusog ug malahutayong pagsaksi sa pagtoo, paglaum ug paghigugma sa Dios ug sa isigkatawo. Apan hibaloi ug salig kamo nga ang akong mga pag-ampo kanunay uban kaninyo. Panalanginan unta sa Dios kanunay ang inyong mga gihaguan ug padaghanon pa unta ang inyong mga katilingban sa misyon.